നിങ്ങളുടെ കുട്ടികൾ മൊബൈൽഫോൺ, ടാബ് ലെറ്റുകൾ, കമ്പ്യൂട്ടറുകൾ എന്നീ ഇലക്ട്രോണിക് ഉപകരണങ്ങൾ അമിതമായി ഉപയോഗിക്കുന്നവരാണോ?..എങ്കിൽ അറിയുക..

കുട്ടികൾ കൂടുതൽ സമയം സ്‌മാർട്ട്‌ഫോണുകൾ, ടാബ്‌ലെറ്റുകൾ, കമ്പ്യൂട്ടറുകൾ എന്നീ ഇലക്‌ട്രോണിക് ഉപകരണങ്ങൾ ഉപയോഗിക്കുന്നത് കർശനമായി നിയന്ത്രിക്കേണ്ടതുണ്ട്. സ്‌ക്രീൻ സമയം കൂടുന്നത് കുട്ടികളിൽ വിവിധ ആരോ​ഗ്യപ്രശ്നങ്ങളുണ്ടാക്കും.

പ്രധാനമായി കുട്ടികളുടെ കണ്ണിനെയും ബുദ്ധിവികാസത്തെയുമാണ് പ്രതികൂലമായി ബാധിക്കുക.

ഡിജിറ്റൽ ഉപകരണങ്ങൾ പഠനത്തിനും വിനോദത്തിനും സ​ഹായിക്കുമെങ്കിലും അമിത സ്‌ക്രീൻ സമയം ശാരീരികവും മാനസികവുമായ ആരോഗ്യത്തെ പ്രതികൂലമായി ബാധിക്കുമെന്ന് ആരോ​ഗ്യ വിദ​ഗ്ധർ പറയുന്നു. മണിക്കൂറോളം നീണ്ടുനിൽക്കുന്ന ഇലക്‌ട്രോണിക് ഉപകരണങ്ങളുടെ ഉപയോഗം ഉറക്കക്കുറവിന് ഇടയാക്കുന്നതായി വിദ​ഗ്ധർ ചൂണ്ടിക്കാട്ടുന്നു.

കുട്ടികൾ ഡിജിറ്റൽ ഉപകരണങ്ങൾ അമിതമായി ഉപയോ​ഗിക്കുമ്പോൾ സാമൂഹിക ഇടപെടലുകളിൽനിന്ന് അവർ പിൻവലിയുന്നതായി വിദ​ഗ്ധർ വ്യക്തമാക്കുന്നു.

കുട്ടികളിലെ മൊബൈൽ അഡിക്ഷൻ മൂലം ഉണ്ടാകുന്ന ഒരു പ്രധാനപ്പെട്ട ആരോ​ഗ്യപ്രശ്നമാണ്  ‘മയോഫാസിയൽ പെയിൻ സിൻഡ്രോം’ (Myofascial pain syndrome). trigger point pain എന്നും ഇതിനെ പറയുന്നു. ഇത് പേശികളിൽ ചുറ്റുമുള്ള ബന്ധിത ടിഷ്യുവിലും വേദന ഉണ്ടാക്കുന്നു. മയോഫാസിയൽ വേദന സിൻഡ്രോം എന്നത് ശരീരത്തിൻ്റെ മൃദുവായ ടിഷ്യൂകളിൽ വേദനയും വീക്കവും ഉണ്ടാകുന്നു…’ – പൂനെയിലെ പിംപ്രിയിലെ ഡിപിയു സൂപ്പർ സ്പെഷ്യാലിറ്റി ഹോസ്പിറ്റലിലെ കൺസൾട്ടൻ്റ് പീഡിയാട്രിക് ന്യൂറോളജിസ്റ്റായ ഡോ. ഷിജി ചാലിപട്ട് പറഞ്ഞു.

സമീപകാലത്ത്, സ്‌കൂളുകളിൽ സ്‌മാർട്ട്‌ഫോണുകൾ, ടാബ്‌ലെറ്റുകൾ, കമ്പ്യൂട്ടറുകൾ എന്നിവയുടെ വർദ്ധിച്ചുവരുന്ന ഉപയോഗം കുട്ടികളിൽ വിവിധ ആരോ​ഗ്യപ്രശ്നങ്ങൾ ഉണ്ടാക്കുന്നുണ്ട്. മൊബെെൽ ഫോൺ, ടാബ് എന്നിവ ഉപയോ​ഗിക്കുമ്പോൾ ദീർഘനേരം കുനിഞ്ഞിരിക്കുന്നത് കഴുത്ത്, തോളുകൾ എന്നിവയ്ക്ക് വേദന ഉണ്ടാക്കാം.

മയോഫാസിയൽ പെയിൻ സിൻഡ്രോമിന്റെ ലക്ഷണങ്ങൾ

പേശി വേദന
ഉറങ്ങാൻ ബുദ്ധിമുട്ട്
മൂഡ് സ്വിംഗ്സ്
ക്ഷീണം
തലവേദന