സ്വന്തം ലേഖിക
പൊന്‍കുന്നം: ചെക്ക്കേസില്‍ കസ്റ്റഡിയിലെടുക്കാന്‍ ചെന്ന എ.എസ്.ഐയെയും കോടതി ജീവനക്കാരെയും ആക്രമിച്ച്‌ രക്ഷപ്പെട്ട പ്രതിയെ പൊന്‍കുന്നം പൊലീസ് അറസ്റ്റ് ചെയ്തു.
ചിറക്കടവ് മണ്ണംപ്ലാവ് ഓരുകോണല്‍ മാഹിന്‍ ജബ്ബാറാണ് (38) അറസ്റ്റിലായത്. ഇയാളുടെ ആക്രമണത്തില്‍ പരിക്കേറ്റ പൊന്‍കുന്നം സ്റ്റേഷനിലെ എ.എസ്.ഐ ആര്‍. അജിത്കുമാര്‍ (46) കാഞ്ഞിരപ്പള്ളി ജനറല്‍ ആശുപത്രിയില്‍ ചികിത്സ തേടി.
Whatsapp Group 1 | Whatsapp Group 2 |Telegram Group
ചൊവ്വാഴ്ച രാവിലെയായിരുന്നു സംഭവം. കോട്ടയം സബ്‌കോടതിയിലെ ചെക്ക് കേസില്‍ പ്രതിയായ മാഹിന്‍ സമന്‍സ് നല്‍കിയിട്ടും ഹാജരായില്ല. ഇതോടെ കോടതി വാറന്റ് പുറപ്പെടുവിച്ചു. ഇതനുസരിച്ച്‌ വാറന്റ് കൈമാറി പ്രതിയെ കസ്റ്റഡിയില്‍ എടുക്കാന്‍ ആമീന്‍, വാറന്റ് എക്‌സിക്യൂഷന്‍ കമീഷന്‍ എന്നിവര്‍ എത്തുകയായിരുന്നു. ഇവര്‍ അറിയിച്ചതനുസരിച്ച്‌ പൊന്‍കുന്നം സ്റ്റേഷനിലെ എ.എസ്.ഐയും കൂടെയെത്തി.
ഇവര്‍ വീട്ടിലെത്തി കാര്യങ്ങള്‍ അറിയിച്ചപ്പോള്‍ ഇവരെ ആക്രമിച്ച്‌ ഇയാള്‍ കടന്നുകളയുകയായിരുന്നു. പിന്നീട് പ്രതിയെ കാഞ്ഞിരപ്പള്ളി കുന്നുംഭാഗത്തുവെച്ച്‌ അറസ്റ്റ് ചെയ്തു. നിലത്തുവീണ് കാലിനും കൈക്കുമാണ് എ.എസ്.ഐക്ക് പരിക്കേറ്റത്.
