ഇന്നലെ ചങ്ങനാശേരിയിൽ അപകടമുണ്ടാക്കിയ സർക്കാർ ആംബുലൻസിന്റെ ടയർ കണ്ണാടിപെലെ വെട്ടിത്തിളങ്ങുന്നത്; ഹെൽമറ്റും സീറ്റ്ബെൽറ്റും പിടിക്കാൻ വ്യ​ഗ്രത കാണിക്കുന്ന പൊലീസും മോട്ടോർ വാഹനവകുപ്പും ഇതു പോലുള്ള കൊള്ളരുതായ്മകൾ കണ്ടില്ലെന്ന് നടിക്കുന്നു; ഫിറ്റ്നെസ് യോഗ്യമല്ലാത്ത ആംബുലൻസ് നിരത്തിലിറക്കുന്നത് ജനങ്ങൾക്ക് ഭീഷണിയാകുന്നു

സ്വന്തം ലേഖകൻ

ചങ്ങനാശേരി: ചങ്ങനാശ്ശേരി എംസി റോഡിൽ പാലാത്ര ജംഗ്ഷനു സമീപം ആംബുലൻസ് നിയന്ത്രണം വിട്ട് റോഡരികിലെ മതിലിൽ ഇടിച്ചു കയറി.

പത്തനംതിട്ടയിൽ നിന്ന് രോഗിയുമായി കോട്ടയം മെഡിക്കൽ കോളജിലേക്ക് വന്ന ആംബുലൻസാണ് അപകടത്തിൽപെട്ടത് .

അപകടം ഉണ്ടാക്കിയ സർക്കാർ ആംബുലൻസിന്റെ ടയർ കണ്ണാടിപോലെയാണ് വെട്ടിത്തിളങ്ങുന്നത്.

ഹെൽമറ്റും സീറ്റ്ബെൽറ്റും പിടിക്കാൻ വ്യ​ഗ്രത കാണിക്കുന്ന പൊലീസും മോട്ടോർ വകുപ്പും ടയറിന്റെ കണ്ടീഷൻ കണ്ടില്ലെന്ന് നടിക്കുകയാണ്. അതുകൊണ്ടാണ് ഇത്തരത്തിൽ ഫിറ്റ്നസ് യോ​ഗ്യമല്ലാത്ത ആംബുലൻസ് നിരത്തിലിറങ്ങുന്നതും അപകടം ഉണ്ടാക്കുന്നതും.

പുറമറ്റം പ്രൈമറി ഹെൽത്ത് സെന്റർ വക ആംബുലൻസാണ് നിയന്ത്രണം വിട്ട് റോഡരികിലെ മതിലിൽ ഇടിച്ചു കയറിയത്. മുൻപിൽ സഞ്ചരിച്ച കാറിനെ മറികടക്കാനുള്ള ശ്രമത്തിനിടയിൽ ആംബുലൻസിന്റെ നിയന്ത്രണം നഷ്ടമായതാണ് അപകടകാരണമെന്ന് സംശയിക്കുന്നതായി ചങ്ങനാശേരി പൊലീസ് പറഞ്ഞു .

നിയന്ത്രണം നഷ്ടമായ ആംബുലൻസ് ഇവിടെ പാർക്ക് ചെയ്തിരുന്ന വാഹനങ്ങളും, മാടക്കടയും ഇടിച്ചു തകർത്തു.

പാർക്കിംങ് ഏരിയയിൽ വച്ചിരുന്ന ബൈക്കുകളും ഇടിച്ചു തെറിപ്പിച്ചു. പിന്നീട് രോ​ഗിയെ മറ്റൊരു ആംബുലൻസിൽ മെഡിക്കൽ കോളേജിലെത്തിക്കുകയായിരുന്നു