“എല്ലാത്തിലും രാഷ്ട്രീയം കാണരുത്’; പരിഗണിച്ചത് പദവി മാത്രം”; ഗവര്‍ണറെ ഉദ്ഘാടനത്തിന് ക്ഷണിച്ചതില്‍ പ്രതികരിച്ച്‌ ചാണ്ടി ഉമ്മൻ

തിരുവനന്തപുരം: ഉമ്മൻചാണ്ടിയുടെ പേര് നല്‍കിയ പുതുപ്പള്ളിയിലെ ആശുപത്രിയിലെ ഡയാലിസിസ് ബ്ലോക്കിന്റെ ഉദ്ഘാടനത്തിന് ഗവർണറെ ക്ഷണിച്ചതില്‍ പ്രതികരണവുമായി ചാണ്ടി ഉമ്മൻ എംഎല്‍എ.

എല്ലാത്തിലും രാഷ്ട്രീയം കാണരുതെന്ന് പ്രതികരിച്ച ചാണ്ടി ഉമ്മൻ ഗവർണറുടെ പദവി മാത്രമാണ് താൻ പരിഗണിച്ചതെന്നും അഭിപ്രായപ്പെട്ടു.

പുതുപ്പളളി പള്ളിയില്‍ നടന്ന പരിപാടിയും ഗവർണറാണ് ഉദ്ഘാടനം ചെയ്തത്. അന്നും അദ്ദേഹത്തിന് എതിരെ ആരോപണങ്ങളുണ്ട്.

എന്നാല്‍ അദ്ദേഹത്തിന്റെ പദവി മാത്രമാണ് പരിഗണിച്ചത്. സ്വകാര്യ ആശുപത്രിയിലെ അധികൃതർ ഒരു ജനപ്രതിനിധിയെന്ന നിലയ്ക്ക് ഗവർണറെ തങ്ങള്‍ക്ക് അതിഥിയായി വേണമെന്ന് അഭ്യർഥിച്ചു. അങ്ങനെയുള്ളപ്പോള്‍ തനിക്ക് അവരോട് അദ്ദേഹത്തിന് നേരെ ഒരുപാട് ആരോപണങ്ങളുണ്ടെന്നും അതിനാല്‍ സാധിക്കില്ലെന്ന് പറയാൻ കഴിയില്ലെന്നും ചാണ്ടി ഉമ്മൻ കൂട്ടിച്ചേർത്തു.