പാലക്കാട്: പാലക്കാട് മണ്ഡലത്തിൽ ബിജെപി വോട്ടർമാർക്ക് പണം നൽകിയെന്ന ആരോപണത്തിൽ അന്വേഷണം പുരോഗമിക്കുന്നു. കൂടുതൽ പേരുടെ മൊഴി രേഖപ്പെടുത്തേണ്ടതുണ്ടെന്ന് വ്യക്തമാക്കിയ ആർഡിഒ, അന്വേഷണം തുടരാൻ അധിക സമയം ആവശ്യപ്പെട്ട് ജില്ലാ കളക്ടറെ സമീപിച്ചു. ആർഡിഒയുടെ ഈ ആവശ്യം കളക്ടർ അംഗീകരിച്ചതോടെ അന്വേഷണം വിപുലീകരിക്കാൻ തീരുമാനമായി. ഇതിനിടെ എൻഡിഎ സ്ഥാനാർത്ഥി ശോഭാ സുരേന്ദ്രന്റെ മൊഴി തെരഞ്ഞെടുപ്പ് കമ്മീഷൻ നേരത്തെ രേഖപ്പെടുത്തിയിരുന്നു.
വോട്ടെടുപ്പിന് മണിക്കൂറുകൾ മാത്രം ബാക്കി നിൽക്കെ ഉയർന്ന ഈ ആരോപണം ബിജെപിയെ പ്രതിരോധത്തിലാക്കി. കണ്ണാടി പഞ്ചായത്തിലെ തരുവാക്കുറിശ്ശിയിൽ ഒരു വയോധികയ്ക്ക് പണം കൈമാറിയെന്നായിരുന്നു കോൺഗ്രസിന്റെ ആരോപണം. ആദ്യം പണം ലഭിച്ചതായി പറഞ്ഞ വയോധിക പിന്നീട് മൊഴി മാറ്റിയതും വിവാദമായി. ദൃശ്യങ്ങൾ പുറത്തുവന്നതോടെ സംഭവം കൂടുതൽ ശ്രദ്ധ നേടുകയും ചെയ്തു.
ഇതോടൊപ്പം വിവിധ പ്രദേശങ്ങളിൽ പണവും സാരിയും വിതരണം ചെയ്തുവെന്ന ആരോപണവും ഉയർന്നു. എന്നാൽ എല്ലാ ആരോപണങ്ങളും ശോഭാ സുരേന്ദ്രൻ നിഷേധിച്ചു. സംഭവം കോൺഗ്രസ് പ്രവർത്തകർ സൃഷ്ടിച്ചതാണെന്നും അവർ പ്രതികരിച്ചു. എന്നാൽ ഇതിന് വിരുദ്ധമായ കൂടുതൽ ദൃശ്യങ്ങൾ കോൺഗ്രസ് പുറത്തുവിട്ടിരുന്നു.
Whatsapp Group 1 | Whatsapp Group 2 |Telegram Group