കാഞ്ഞിരപ്പള്ളിയിൽ വിദ്യാർത്ഥിനി ബസിൽ നിന്ന് തെറിച്ച് വീണ് പരുക്കേറ്റ സംഭവം ; നിർത്താതെ പോയ സ്വകാര്യ ബസ് ജീവനക്കാർക്കെതിരെ കേസെടുത്ത് പോലീസ്

കോട്ടയം : കാഞ്ഞിരപ്പള്ളിയിൽ വിദ്യാർത്ഥിനി ബസിൽ നിന്ന് വീണ് പരുക്കേറ്റ സംഭവത്തിൽ നിർത്താതെ പോയ സ്വകാര്യ ബസ് ജീവനക്കാർക്കെതിരെ കേസെടുത്ത് പോലീസ്.

കാഞ്ഞിരപ്പള്ളി പോലീസാണ് ഡ്രൈവർക്കും കണ്ടക്ടർക്കുമെതിരെ കേസെടുത്തിരിക്കുന്നത്. വിദ്യാർത്ഥിനിയിൽ നിന്ന് മൊഴി രേഖപ്പെടുത്തിയതിന് ശേഷമാണ് പോലീസ് കേസെടുത്തത് .

അപകടത്തിനിടയാക്കിയ ബസ് സംഭവ ദിവസം രാത്രിയിൽ തന്നെ പോലീസ് കസ്റ്റഡിയിൽ എടുത്തിരുന്നു. ബസ് ജീവനക്കാർക്കെതിരെ നടപടി ഉണ്ടാകുമെന്ന് മോട്ടോർ വാഹന വകുപ്പ് ഉദ്യോഗസ്ഥരും അറിയിച്ചിട്ടുണ്ട്.

നോട്ടീസ് നൽകിയ ശേഷമാകും മോട്ടോർ വാഹന വകുപ്പ് നടപടികളിലേയ്ക്ക് കടക്കുക.