ട്രെയിലറിന്റെ പിന്നിലിടിച്ച കാർ റെയിൽവേ ട്രാക്കിലേയ്ക്ക് മറിഞ്ഞു: സംഭവം കൊച്ചി വൈറ്റിലയിൽ

സ്വന്തം ലേഖകൻ

കൊച്ചി : വൈറ്റിലയില്‍ കാര്‍ പാലത്തില്‍നിന്ന് റയില്‍വേ ട്രാക്കിലേക്ക് വീണു. വൈറ്റില മേല്‍പ്പാലത്തില്‍ വച്ച് ട്രെയിലറിന്‍റെ പിന്നിലിടിച്ചാണ് അപകടം. കാറില്‍ എളമക്കര സ്വദേശി അർജുൻ മാത്രമാണുണ്ടായിരുന്നത്. ഇയാളെ ഗുരുതര പരുക്കോടെ ആശുപത്രിയിലാക്കി.

രാവിലെ 8.45 നാണ് അപകടം നടക്കുന്നത്. ഇടപ്പള്ളിയിൽ നിന്നും വൈറ്റിലയിലേക്ക് വരികയായിരുന്നു ഇരുവാഹനങ്ങളും. മേൽപ്പാലത്തിന്റെ കൈവരികളും വൈദ്യുതി പോസ്റ്റും തകർത്ത് കാർ താഴേക്കു പതിക്കുകയായിരുന്നു. സമീപത്തുണ്ടായിരുന്നു ഓട്ടോ റിക്ഷ ഡ്രൈവർമാരാണ് ആദ്യം കാണുന്നത്. ഉടൻ തന്നെ നാട്ടുകാർ ഓടിയെത്തി രക്ഷാപ്രവർത്തനം നടത്തി. കാറിലുണ്ടായിരുന്നയാളെ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. അഭിഭാഷകനാണ് ഇയാളെന്ന് കരുതുന്നു.