ചങ്ങനാശേരി: ബൈപ്പാസിൽ അമിത വേഗത്തിൽ പാഞ്ഞ കാർ നിയന്ത്രണം വിട്ട് നാല് പോസ്റ്റ് ഇടിച്ചു തകർത്ത് മറിഞ്ഞ് മൂന്നു യുവാക്കൾക്ക് പരിക്ക്. ചങ്ങനാശേരി സ്വദേശികളായ യുവാക്കളെ പരിക്കുകളോടെ താലൂക്ക് ആശുപത്രിയിൽ പ്രവേശിപ്പിച്ചു. ഞായറാഴ്ച വൈകിട്ട് ആറരയോടെ ബൈപ്പാസിൽ മോർക്കുളങ്ങരയിലാണ് അപകടമുണ്ടായത്. അമിത വേഗത്തിൽ പാഞ്ഞെത്തിയ കാർ നിയന്ത്രണം വിട്ട് പോസ്റ്റിൽ ഇടിക്കുകയായിരുന്നു. റോഡരികിൽ നിന്ന നാല് പോസ്റ്റുകളാണ് കാർ ഇടിച്ചു തകർത്തത്. തുടർന്ന് കാർ സമീപത്തേയ്ക്ക് തല കുത്തി മറിഞ്ഞു. അപകടത്തിൽ ആർക്കും ഗുരുതരമായി പരിക്കേറ്റില്ല. കാറിനുള്ളിൽ കുടുങ്ങിക്കിടന്ന ഡ്രൈവറെ അഗ്നിരക്ഷാ സേനയും ഓടിക്കൂടിയ നാട്ടുകാരും ചേർന്നാണ് ആശുപത്രിയിൽ എത്തിച്ചത്. പരിക്കേറ്റവരെ താലൂക്ക് ആശുപത്രി അത്യാഹിത വിഭാഗത്തിൽ പ്രാഥമിക ചികിത്സ നൽകി. നിരീക്ഷണത്തിന് ശേഷം ആവശ്യമെങ്കിൽ ഇവരെ മെഡിക്കൽ കോളേജ് ആശുപത്രിയിലേയ്ക്ക് മാറ്റും.

ബൈപ്പാസിലൂടെ അവധി ദിവസങ്ങളിലും ഞായറാഴ്ചകളിലും അമിത വേഗത്തിലാണ് വാഹനങ്ങൾ പായുന്നത്. ഇത് നിയന്ത്രിക്കാൻ പലപ്പോഴും പൊലീസിനും സാധിക്കാറില്ല. അമിത വേഗത്തിൽ പായുന്നതാണ് ഇവിടെ അപകടങ്ങൾക്ക് ഇടയാക്കുന്നതെന്നാണ് നാട്ടുകാരുടെ പരാതി. ഞായറാഴ്ചകളിൽ ഇതുവഴി പായുന്ന യുവാക്കളിൽ പലരും മദ്യലഹരിയിലാണ് വാഹനം ഓടിക്കുന്നതെന്നും പരാതി ഉയർന്നിട്ടുണ്ട്. ഈ സാഹചര്യത്തിൽ പൊലീസ് വാഹന പരിശോധന അടക്കം കർശനമാക്കണമെന്ന ആവശ്യമാണ് ഉയരുന്നത്.