ടിപ്പറിൽ ഇടിക്കാതിരിക്കാൻ വെട്ടിച്ചു ;  പാലാ കിടങ്ങൂരിൽ നിയന്ത്രണം വിട്ട ബസ് വീട്ടിലേക്ക് ഇടിച്ചുകയറി

പാലാ :  കിടങ്ങൂരിൽ നിയന്ത്രണം വിട്ട ബസ് റോഡരികിലെ വീട്ടിലേക്ക് ഇടിച്ചുകയറി അപകടം. കിടങ്ങൂർ അയർക്കുന്നം റൂട്ടിൽ കല്ലിട്ടു നടയിൽ ഇന്ന് രാവിലെ ഒമ്പതരയോടെയാണ് അപകടമുണ്ടായത്.

മൂവാറ്റുപുഴ – കോട്ടയം റൂട്ടിൽ സർവ്വീസ് നടത്തുന്ന ശാലോം ബസ്സാണ് അപകടത്തിൽപ്പെട്ടത്.

എതിരെ വന്ന ടിപ്പറിൽ ഇടിക്കാതിരിക്കാൻ ബസ് വെട്ടിച്ചതോടെ  നിയന്ത്രണം നഷ്ടപ്പെട്ട ബസ് പോളയ്ക്കൽ ജോമോൻ ജോസഫിൻ്റ വീട്ടിലേക്ക് ഇടിച്ചു കയറുകയായിരുന്നു.

വീട്ടുമുറ്റത്തെ ചെറിയ പ്ലാവിൽ  ഇടിച്ചതിന് ശേഷം ബസ് ഭിത്തിയിൽ ഇടിച്ചു നിൽക്കുകയായിരുന്നു.

അപകട സമയത്ത് വീട്ടിൽ ജോമോന്റെ അമ്മയും ഭാര്യയും 3 മക്കളും ഉണ്ടായിരുന്നു. അപകടത്തിൽ ആർക്കും പരിക്കില്ല.