സൈക്കിൾ ചവി​ട്ടുന്നതി​നി​ടെ ​ആഴമുള്ള തോട്ടിലേക്ക് വീണു ; ഒന്നാം ക്ലാസുകാരി​യുടെ രക്ഷകനായി​ 11വയസുകാരൻ സഹോദരൻ

സ്വന്തം ലേഖകൻ

കുട്ടനാട്: സൈക്കിൾ ചവി​ട്ടുന്നതി​നി​ടെ ​ആഴമുള്ള തോട്ടിലേക്ക് വീണ ഒന്നാം ക്ലാസുകാരി​യുടെ രക്ഷകനായി​ 11കാരൻ സഹോദരൻ. നെടുമുടി പഞ്ചായത്ത് 14ാം വാർഡ് ചെമ്പുംപുറം കീപ്പട വീട്ടിൽ ടോമിച്ചന്റെയും നാൻസിയുടേയും മകൾ അലാന ട്രീസാ ടോമിച്ചന്റെ (6) ജീവനാണ് സഹോദരൻ ആരോൺ രക്ഷിച്ചത് .

വീടീന് മുന്നിലുള്ള റോഡിൽ സൈക്കിൾ ചവിട്ടുന്നതിനിടെയാണ് ചെമ്പുംപുറം സാംസ്ക്കാരിക നിലയം പുളിക്കകാവ് തോട്ടിലേക്ക് അലാന വീണത്. പി​ന്നാലെ എത്തി​യ ആരോൺ​ ഇത് കണ്ടു. നീന്തൽ വശമില്ലെങ്കിലും തോടിന്റെ സംരക്ഷണഭിത്തിയിൽ കമിഴ്ന്നു കിടന്നുകൊണ്ട് ആരോൺ​, വെള്ളത്തിലേക്ക് മുങ്ങിത്താഴ്ന്ന അലാനയുടെ ഉടുപ്പിന്റെ കോളറിൽ പിടിച്ചു.

അലറി വിളിച്ചതോടെ, പരിസരവാസികളും അമ്മ നാൻസിയും ഓടിയെത്തി അലാനയെ കരയ്ക്കു കയറ്റി​.ആരോണിന്റെ പിടിയിൽ കിട്ടിയില്ലായിരുന്നെങ്കിൽ പോളയും പുല്ലും നിറഞ്ഞ നി​ലയി​ല്ലാതോട്ടി​ൽ അലാന മുങ്ങി​പ്പോകുമായി​രുന്നു.മുമ്പ് ഇതേ തോട്ടിൽ വീണ് രണ്ടുപേർ മരി​ച്ചി​ട്ടുണ്ടെന്ന് നാട്ടുകാർ പറഞ്ഞു . ചമ്പക്കുളം ബിഷപ് കുര്യാളശ്ശേരി പബ്ലിക് സ്ക്കൂളിലെ ആറാം ക്ലാസ് വിദ്യാർത്ഥിയാണ് ആരോൺ. അലാന ഇവി​ടെ ഒന്നാംക്ളാസ് വി​ദ്യാർത്ഥി​നി​യും.