ഞാൻ ഇതുവരെ ചെയ്യാത്തൊരു കാര്യം ഒന്ന് പരീക്ഷിക്കുന്നു, സിനിമ നിർമ്മാണം; അറിയിപ്പുമായി ബേസില്‍ ജോസഫ്

കൊച്ചി: സംവിധായകനും നടനുമായ ബേസില്‍ ജോസഫ് സിനിമാ നിർമാണത്തിലേക്ക്.

ബേസില്‍ തന്നെയാണ് സോഷ്യല്‍ മീഡിയ പേജിലൂടെ ഇക്കാര്യം പ്രഖ്യാപിച്ചത്.

‘ബേസില്‍ ജോസഫ് എന്റർടെയ്ൻമെന്റ്’ എന്നാണ് പേര് നല്‍കിയിരിക്കുന്നത്. ബാനറിന്റെ ടെെറ്റില്‍ ഗ്രാഫിക്സും പുറത്തുവിട്ടിട്ടുണ്ട്.

‘അപ്പോള്‍, ഇതാ വീണ്ടും തുടങ്ങുന്നു, ഞാൻ ഇതുവരെ ചെയ്യാത്തൊരു കാര്യം ഒന്ന് പരീക്ഷിക്കുന്നു, സിനിമ നിർമ്മാണം. എങ്ങനെയെന്ന് ഇപ്പോഴും പഠിച്ചുവരുന്നതേയുള്ളൂ. എന്നാല്‍ കഥകള്‍ കൂടുതല്‍ നന്നായി, ധെെര്യപൂർവം, പുതിയ രീതിയില്‍ പറയാൻ ഞാൻ ആഗ്രഹിക്കുന്നു. ഈ പുതിയ പാത നമ്മെ എവിടേക്ക് കൊണ്ടുപോകുമെന്ന് നോക്കാം. ബേസില്‍ ജോസഫ് എന്റർടെയ്ൻമെന്റിലേക്ക് സ്വാഗതം’- ബേസില്‍ കുറിച്ചു.