സ്വന്തം ലേഖകൻ
പാലക്കാട്: അട്ടപ്പാടി മധുവധക്കേസിൽ മധുവിന് നീതി കിട്ടിയിട്ടില്ലെന്ന് ബന്ധുക്കള്. കേസില് 16 പ്രതികളും ശിക്ഷിക്കപ്പെടണം. മുഴുവന് പ്രതികളും ശിക്ഷിക്കപ്പെടുന്നത് വരെ നിയമനടപടികളുമായി മുന്നോട്ടുപോകുമെന്ന് മധുവിന്റെ അമ്മ മല്ലിയും സഹോദരി സരസുവും മാധ്യമങ്ങളോട് പറഞ്ഞു.
’14 പ്രതികളെ ശിക്ഷിച്ച് കൊണ്ടുള്ള കോടതി വിധിയില് സന്തോഷമുണ്ട്. താഴെക്കിടയില് നിന്ന് ഇത്രയും പ്രവര്ത്തിക്കാന് കഴിഞ്ഞു എന്നതില് സന്തോഷമുണ്ട്. കോടതിയോടും നന്ദിയുണ്ട്. ഇതേപോലെ തന്നെ പോരാടി വെറുതെ വിട്ട രണ്ടുപേരെ കൂടി ശിക്ഷിക്കുന്നതിന് നടപടികളുമായി മുന്നോട്ടുപോകും. നിരവധി ഭീഷണികളും ഒറ്റപ്പെടുത്തലുകളും നേരിട്ടാണ് ഇവിടെ വരെ എത്തിയത്’- സഹോദരി സരസു പറഞ്ഞു.
Whatsapp Group 1 | Whatsapp Group 2 |Telegram Group
‘പോരാട്ടത്തിലൂടെ 14 പേര് കുറ്റക്കാരാണ് എന്ന വിധി സമ്പാദിക്കാന് സാധിച്ചു. രണ്ടുപേരെ വെറുതെ വിട്ടതിനെതിരെ നിയമനടപടി സ്വീകരിക്കും. സുപ്രീംകോടതി വരെ എത്താന് കഴിയും എന്ന പ്രതീക്ഷയോടെ മുന്നോട്ടുപോകും.
എന്നാല് മധുവിന് നീതി കിട്ടിയില്ല. 16 പേരും ശിക്ഷിക്കപ്പെടുമ്പോള് മാത്രമാണ് മധുവിന് പൂര്ണമായി നീതി കിട്ടുകയുള്ളൂ. എങ്കിലും 14 പേരെ ശിക്ഷിക്കാന് കഴിഞ്ഞല്ലോ. ഈ ആത്മവിശ്വാസത്തോടെ നിയമനടപടികളുമായി മുന്നോട്ടുപോകും. കേസില് സഹായിച്ച അഗളി പൊലീസിലെ ഉദ്യോഗസരടക്കമുള്ളവരോട് നന്ദിയുണ്ട്’- സരസു വ്യക്തമാക്കി.
