കോട്ടയത്ത് വീട്ടമ്മയ്ക്കു നേരേ അജ്ഞാത സംഘത്തിന്‍റെ ആക്രമണം; ഷാള്‍ തലയിലിട്ടശേഷം ശരീരത്തിലേക്ക് കുരുമുളക് പൊടിയും അരിപ്പൊടിയും വിതറി; വീട്ടമ്മയ്ക്ക് നേരെ ഇതിന് മുമ്പും സമാനമായ ആക്രമണം നടന്നിട്ടുണ്ടെന്ന് ഭർത്താവ്; പോലീസ് അന്വേഷണം ആരംഭിച്ചു
സ്വന്തം ലേഖിക
കോട്ടയം: കൊല്ലാട് ഷാപ്പുംപടിയില്‍ വീട്ടമ്മയ്ക്കു നേരേ അജ്ഞാത സംഘത്തിന്‍റെ ആക്രമണം.
ഷാള്‍ തലയിലിട്ടശേഷം അക്രമി സംഘം ഇവരുടെ തലയിലേക്കും ശരീരത്തിലേക്കും കുരുമുളക് പൊടിയും അരിപ്പൊടിയും ചൊറിയുന്ന തരം പൊടിയും എറിഞ്ഞതായാണ് ആരോപണം. കൊല്ലാട് കളങ്കുന്നേല്‍ അലക്സ് തോമസിന്‍റെ ഭാര്യ സവിത അലക്സിനു നേരെയാണ് ആക്രമണം ഉണ്ടായത്.
Whatsapp Group 1 | Whatsapp Group 2 |Telegram Group
വെള്ളിയാഴ്ച രാവിലെ 11.30നു കൊല്ലാട് ഷാപ്പുംപടിയിലെ ഇവരുടെ വീട്ടിലായിരുന്നു സംഭവം. വീടിന്‍റെ പിന്നില്‍ അടുക്കള ഭാഗത്തുകൂടി ഇവര്‍ മാലിന്യങ്ങള്‍ കളയുന്നതിനു പുറത്തിറങ്ങിയതായിരുന്നു. ഈ സമയം തന്‍റെ തലയില്‍ ഷാളിനു സമാനമായ തുണി പുതപ്പിച്ചശേഷം നാലംഗ അക്രമി സംഘം മുളകുപൊടിയും അരിപ്പൊടിയും വിതറി ആക്രമണം നടത്തുകയായിരുന്നുവെന്നു വീട്ടമ്മ പോലീസിനു മൊഴി നല്‍കി.
ഇവരുടെ ഭര്‍ത്താവും മകളും മാത്രമായിരുന്നു ഈ സമയം വീട്ടിലുണ്ടായിരുന്നത്. ഭാര്യയുടെ ബഹളം കേട്ട് ഭര്‍ത്താവ് അലക്സ് ഓടിയെത്തിയപ്പോഴേക്കും അക്രമി സംഘം ഓടി രക്ഷപ്പെട്ടിരുന്നതായി വീട്ടമ്മയും ഭര്‍ത്താവും പറയുന്നു.
അക്രമിസംഘത്തില്‍ നാലു പേരുണ്ടായിരുന്നതായും ഒരാള്‍ പെണ്‍വേഷം കെട്ടിയിരുന്നതായും വീട്ടമ്മ പറയുന്നു. ഈസ്റ്റ് സ്റ്റേഷന്‍ ഹൗസ് ഓഫീസര്‍ റെജോ പി. ജോസഫിന്‍റെ നേതൃത്വത്തില്‍ പോലീസ് സംഘം സ്ഥലത്തെത്തി അന്വേഷണം ആരംഭിച്ചു. പ്രതികള്‍ മുളകുപൊടി പൊതിഞ്ഞുകൊണ്ടുവന്നതായി സംശയിക്കുന്ന പത്രക്കടലാസും സംഭവ സ്ഥലത്തുനിന്നും ലഭിച്ചിട്ടുണ്ട്.
ഇവര്‍ പറഞ്ഞതിനു സമാനമായ കാര്യങ്ങളൊന്നും ഇവിടെനിന്നും കണ്ടെത്താന്‍ സാധിച്ചിട്ടില്ല. അക്രമം ഉണ്ടായ സമയത്ത് വീട്ടിലെ സിസിടിവി കാമറകള്‍ ഒന്നും പ്രവര്‍ത്തിച്ചിരുന്നില്ല. വിശദമായ അന്വേഷണത്തിനുശേഷം മാത്രമേ ഇതു സംബന്ധിച്ചു വ്യക്തതവരുത്താന്‍ സാധിക്കൂ എന്ന് പോലീസ് പറഞ്ഞു. കഴിഞ്ഞ ദിവസവും സമാന രീതിയില്‍ ഈ വീട്ടമ്മയ്ക്കുനേരേ ആക്രമണം ഉണ്ടായതായും ഭര്‍ത്താവ് പറയുന്നു.
