തിരുവനന്തപുരം: ആരോഗ്യമന്ത്രിക്കെതിരെ സമരം നടത്തുന്ന യൂത്ത് കോണ്ഗ്രസിന് മുന്നറിയിപ്പുമായി ഡിവൈഎഫ്ഐ. ആ കളി അവസാനിപ്പിച്ചേക്കെന്ന് ഡിവൈഎഫ്ഐ സംസ്ഥാന പ്രസിഡന്റ് വി.
വസീഫ് മുന്നറിയിപ്പ് നല്കി. വണ്ടാനം മെഡിക്കല് കോളേജില് ശസ്ത്രക്രിയക്കിടെ രോഗിയുടെ വയറ്റില് ഉപകരണം വയറ്റില് കുടുങ്ങിയ സംഭവത്തില് കടുത്ത പ്രതിഷേധവുമായി യൂത്ത് കോണ്ഗ്രസ് രംഗത്തെത്തിയതിന് പിന്നാലെയാണ് മുന്നറിയിപ്പ്.
ആരോഗ്യമന്ത്രി വീണ ജോര്ജിന്റെ ഔദ്യോഗിക വസതിക്ക് മുന്നില് റീത്തുമായി എത്തിയായിരുന്നു യൂത്ത് കോണ്ഗ്രസ് പ്രവര്ത്തകരുടെ പ്രതിഷേധം. ഇന്ന് രാവിലെ എട്ട് മണിയോടെ വീണ ജോര്ജിന്റെ വീടിന് മുന്നില് പൊലീസിനെ മറി കടന്ന് ഇരച്ച് കയറിയ പ്രവര്ത്തകര് വീടിന്റെ വാതിലില് റീത്ത് വെച്ചു. പിന്നീട് പൊലീസ് ഉദ്യോഗസ്ഥര് റീത്ത് എടുത്ത് മാറ്റി. മന്ത്രിയുടെ ഔദ്യോഗിക വീടിന് വസതിക്ക് മുന്നില് വന് സുരക്ഷാ വീഴ്ചയാണ് പൊലീസിന് ഉണ്ടായത്. മൂന്ന് പൊലീസുകാര് മാത്രമാണ് മന്ത്രിയുടെ വീടിന് മുന്നില് സുരക്ഷയ്ക്കായി ഉണ്ടായിരുന്നത്.
പ്രതിഷേധം ഉണ്ടായി 15 മിനിറ്റിന് ശേഷമാണ് കൂടുതല് പൊലീസുകാര് എത്തുന്നത്. പ്രതിഷേധക്കാരെ അറസ്റ്റ് ചെയ്ത് നീക്കുന്നതിനിടെ കയ്യേറ്റം. കസ്റ്റഡിയിലെടുത്തവരെ കൊണ്ടുപോകാന് അനുവദിക്കാതെ പ്രവര്ത്തകര് പ്രതിഷേധിച്ചതാണ് കയ്യാങ്കളിയിലേക്ക് നയിച്ചത്. ഏറെ നേരത്തെ ശ്രമത്തിന് ശേഷം പ്രവര്ത്തകരെ പൊലീസ് പിരിച്ച് വിട്ടു.
Whatsapp Group 1 | Whatsapp Group 2 |Telegram Group
പിന്നാലെ പത്തനംതിട്ട ടൗണ്ഹാളിലെ ആരോഗ്യമന്ത്രിയുടെ പരിപാടിയില് പ്രതിഷേധമുണ്ടായി. മന്ത്രി പങ്കെടുത്ത യോഗത്തിലാണ് കോണ്ഗ്രസ് ജനപ്രതിനിധികളുടെ പ്രതിഷേധമുണ്ടായത്. ഇതോടെ യോഗം അലങ്കോലപ്പെടുകയായിരുന്നു.
ജനറല് ആശുപത്രി ജില്ലാ പഞ്ചായത്തിലേക്ക് മാറ്റിയതില് അടക്കമായിരുന്നു മന്ത്രിക്കുനേരെ പ്രതിഷേധം ഉണ്ടായത്. പ്രതിഷേധം എല്ഡിഎഫ് പ്രതിനിധികള് പ്രതിരോധിച്ചതോടെ സ്ഥലത്ത് സംഘർഷമുണ്ടായി. ഇതോടെ യോഗം നിർത്തിവെക്കുകയായിരുന്നു.
