വയനാട് ഉരുൾപൊട്ടൽ ദുരന്തം ; കേന്ദ്ര മന്ത്രി അമിത് ഷാക്കെതിരെ കോൺഗ്രസ് നീക്കം.. പ്രിവിലേജ് നോട്ടീസ് നൽകി

വയനാട്ടിലെ ഉരുൾപൊട്ടലിൽ കേന്ദ്ര ആഭ്യന്തര മന്ത്രി അമിത് ഷാ നടത്തിയ അവകാശവാദത്തിനെതിരെ കോൺഗ്രസ് നീക്കം.

അമിത് ഷായ്‌ക്കെതിരെ പ്രത്യേകാവകാശ പരാതി നൽകി.

കോൺഗ്രസ് എംപി ജയറാം രമേശാണ് പ്രിവിലേജ് നോട്ടീസ് നൽകിയത്.

വയനാട്ടിൽ ഉരുൾപൊട്ടലിന് മുന്നോടിയായി കേരള സർക്കാരിന് മുൻകൂർ മുന്നറിയിപ്പ് നൽകിയെന്ന അമിത് ഷായുടെ അവകാശവാദത്തിനെതിരെയാണ് നോട്ടീസ്.

കേരള സർക്കാർ മുന്നറിയിപ്പുകൾ പാലിച്ചില്ലെന്നും അമിത് ഷാ അവകാശപ്പെട്ടിരുന്നു.

എന്നാൽ പ്രിവിലേജ് നോട്ടീസിൽ ജയറാം രമേശ് ആഭ്യന്തര മന്ത്രിയുടെ ഈ വാദം തള്ളി.

“കേന്ദ്രസർക്കാരിൻ്റെ മുൻകൂർ താക്കീത് തെറ്റാണെന്ന് തെളിയിക്കപ്പെട്ടിട്ടുണ്ട്.

കേന്ദ്ര ആഭ്യന്തരമന്ത്രി രാജ്യസഭയെ തെറ്റിദ്ധരിപ്പിച്ചുവെന്ന് വ്യക്തമാണ്. ഒരു മന്ത്രിയോ അംഗമോ സഭയെ തെറ്റിദ്ധരിപ്പിക്കുന്നത് പദവിയുടെ ലംഘനവും സഭയെ അവഹേളിക്കുന്നതും ആണെന്ന് സ്ഥിരീകരിക്കപ്പെട്ടതാണ്. ” പ്രിവിലേജ് നോട്ടീസിൽ പറയുന്നു.

ജൂലൈ 31 ബുധനാഴ്ച രാജ്യസഭയിൽ നടത്തിയ പ്രസംഗത്തിലാണ് ജൂലൈ 23 ന് കേരള സർക്കാരിന് ഉരുൾപൊട്ടൽ സംബന്ധിച്ച് നേരത്തെയുള്ള മുന്നറിയിപ്പ് നൽകിയിരുന്നതായി ആഭ്യന്തരമന്ത്രി അവകാശപ്പെട്ടത്.

“സംഭവത്തിന് ഏഴ് ദിവസം മുമ്പ് ജൂലൈ 23 ന് കേന്ദ്രം കേരള സർക്കാരിന് നേരത്തെ മുന്നറിയിപ്പ് നൽകിയിരുന്നുവെന്ന് ഞാൻ വ്യക്തമാക്കാൻ ആഗ്രഹിക്കുന്നു, തുടർന്ന് ജൂലൈ 24, 25 തീയതികളിൽ ഞങ്ങൾ അവർക്ക് വീണ്ടും മുന്നറിയിപ്പ് നൽകിയിരുന്നു. ജൂലൈ 26 ന് മുന്നറിയിപ്പ് നൽകിയിരുന്നു. 20 സെൻ്റിമീറ്ററിൽ കൂടുതൽ കനത്ത മഴയ്ക്ക് സാധ്യതയുണ്ടെന്നും ഉരുൾപൊട്ടലിനുള്ള സാധ്യതയുണ്ടെന്നും അദ്ദേഹം സഭയിൽ പറഞ്ഞു.