അടൂരില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസ്; പ്രതിക്ക് കഠിനതടവും പിഴയും വിധിച്ച്‌ കോടതി

അടൂർ: പ്രായപൂർത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പ്രതിക്ക് അടൂർ ഫാസ്റ്റ് ട്രാക്ക് സ്പെഷ്യല്‍ കോടതി കഠിനതടവും പിഴയും വിധിച്ചു.

നാരങ്ങാനം കാവുങ്കല്‍ വീട്ടില്‍ ബിജിൻ (27) നെയാണ് കോടതി ആറ് വർഷത്തെ കഠിനതടവിനും 55,000 രൂപ പിഴയടയ്ക്കാനും ശിക്ഷിച്ചത്.

2022-ല്‍ രജിസ്റ്റർ ചെയ്ത കേസില്‍ പത്തനംതിട്ട വനിതാ പോലീസ് സ്റ്റേഷൻ ഇൻസ്പെക്ടറായിരുന്ന ഷൈല.ഇ ആണ് എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിച്ചത്. പിന്നീട് റാന്നി ഡെപ്യൂട്ടി പോലീസ് സൂപ്രണ്ടായ ആർ.ജയരാജാണ് കേസിന്റെ തുടർനടപടികള്‍ പൂർത്തിയാക്കി കോടതിയില്‍ ചാർജ് ഷീറ്റ് സമർപ്പിച്ചത്.

കേസില്‍ പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ അഡ്വക്കേറ്റ് സ്മിത ജോണ്‍ പി. ഹാജരായി.