അച്ചന്‍കോവിലാറില്‍ കുളിക്കാനിറങ്ങിയ രണ്ട് വിദ്യാര്‍ത്ഥികള്‍ മുങ്ങി മരിച്ചു; ഒരാള്‍ നീന്തി രക്ഷപ്പെട്ടു

സ്വന്തം ലേഖിക

ആലപ്പുഴ: തഴക്കര വെട്ടിയാറില്‍ അച്ചന്‍കോവിലാറില്‍ കുളിക്കാനിറങ്ങിയ മൂന്നംഗ സംഘത്തിലെ രണ്ടുവിദ്യാര്‍ത്ഥികള്‍ മുങ്ങിമരിച്ചു.

മൂന്നാമന്‍ നീന്തി രക്ഷപ്പെട്ടു. മാവേലിക്കര വെട്ടിയാര്‍ തവാല്‍ വടക്കേതില്‍ അഭിമന്യു (15), ആദര്‍ശ് (17) എന്നിവരാണ് മരിച്ചത്.

വെട്ടിയാര്‍ തവാല്‍ വടക്കേതില്‍ ഉണ്ണിക്കൃഷ്ണന്‍ (14) ആണ് രക്ഷപ്പെട്ടത്.

ബന്ധുക്കളായ മൂന്നംഗ സംഘം സൈക്കിള്‍ ചവിട്ടാന്‍ പോകുന്നെന്ന് പറ‌ഞ്ഞാണ് വീട്ടില്‍ നിന്ന് പോയത്.

പിന്നീട് കടവില്‍ സൈക്കിള്‍ നിറുത്തിയ ശേഷം പുഴയിലേക്ക് ഇറങ്ങിയപ്പോഴാണ് അപകടം സംഭവിച്ചതെന്നാണ് വിവരം.