ഇറച്ചിക്കോഴികളെ കൊടുത്തതിന്‍റെ പണം കൊടുക്കാൻ വൈകി ; കടയുടമയുടെ മകനെ കൊലപ്പെടുത്താൻ ശ്രമം ; പ്രതികള്‍ക്ക് 15 വർഷം തടവ്

സ്വന്തം ലേഖകൻ

മാന്നാർ: കോഴിക്കടയിൽ ഇറച്ചിക്കോഴികളെ കൊടുത്തതിന്‍റെ പണം കൊടുക്കാൻ വൈകിയതിന് കോഴിക്കട ഉടമയുടെ മകനെ കൊലപ്പെടുത്താൻ ശ്രമിച്ച കേസിലെ പ്രതികള്‍ക്ക് 15 വർഷം തടവ് വിധിച്ച് കോടതി.

മാന്നാർ കുരട്ടിക്കാട് കുറ്റിയിൽ മുക്കിനു സമീപം പ്രവർത്തിക്കുന്ന ഫ്രണ്ട്സ് ചിക്കൻ സെന്റർ ഉടമ മാന്നാർ കുരട്ടിശ്ശേരി ഫാത്തിമ മൻസിലിൽ മുഹമ്മദ് ഖനിയുടെ മകൻ വസീം അഫ്സൽ( 23)നെയാണ് കൊലപ്പെടുത്താൻ ശ്രമിച്ചത്‌.

രണ്ട് പ്രതികൾക്കും 15വർഷം തടവും 35000/-രൂപ പിഴയുമാണ് ശിക്ഷ. ചെങ്ങന്നൂർ അസിസ്റ്റന്റ് സെഷൻസ് കോടതി ജഡ്ജി വീണ വിഎസ് ആണ് ശിക്ഷ വിധിച്ചത്. വസീമിനെ ബൊലേറോ പിക്കപ്പ് വാൻ ഉപയോഗിച്ച് ഇടിച്ചു കൊലപ്പെടുത്തുവാൻ ശ്രമിച്ച കേസിൽ ഒന്നാം പ്രതി മാവേലിക്കര തെക്കേക്കര വില്ലേജിൽ തടത്തിലാൻ കൃഷ്ണ നിവാസിൽ രാധാകൃഷ്ണൻ (58) തെക്കേക്കര വില്ലേജ് കുറത്തിക്കാട് പള്ളികിഴക്ക് സുഭാഷ് ഭവനിൽ സുഭാഷ് കുമാർ (40) എന്നിവരാണ് പ്രതികള്‍. 2018ലാണ് കേസിന് ആസ്പദമായ സംഭവം. എറണാകുളത്ത് എംബിഎ വിദ്യാർത്ഥിയായിരുന്നു വസീം.