നിയന്ത്രണം വിട്ട കാര്‍ മതിലില്‍ ഇടിച്ചു, മുത്തച്ഛനും പേരക്കുട്ടിയും മരിച്ചു; അഞ്ചുപേര്‍ക്ക് പരിക്ക്

സ്വന്തം ലേഖകൻ

കോഴിക്കോട്: നിയന്ത്രണം വിട്ട കാർ റോഡരികിലെ മതിലിൽ ഇടിച്ച് രണ്ടുമരണം. കാർ യാത്രക്കാരായ മുത്തച്ഛനും പേരക്കുട്ടിയുമാണ് മരിച്ചത്. മടവൂർ കടവാട്ട് പറമ്പത്ത് സദാനന്ദൻ (67), മകന്റെ മകൻ ധൻജിത്ത് (7) എന്നിവരാണ് മരിച്ചത്. അഞ്ചു പേർക്ക് പരിക്കേറ്റു.

ഉച്ചയ്ക്ക് 12 മണിയോടെ ബാലുശേരി – കൊയിലാണ്ടി സംസ്ഥാന പാതയിൽ ഉള്ളിയേരിക്കു സമീപമാണ് അപകടം. മടവൂരിൽ നിന്ന് പുറപ്പെട്ട കാർ നിയന്ത്രണംവിട്ട് റോഡരികിലെ മതിലിൽ ഇടിക്കുകയായിരുന്നു. സദാനന്ദന്റെ മകളുടെ ഗൃഹപ്രവേശന ചടങ്ങുമായി ബന്ധപ്പെട്ട് പോകുമ്പോഴാണ് അപകടം നടന്നത്. വാഹനത്തിൽ ഇരുവർക്കുമൊപ്പം അഞ്ചുപേർ കൂടി ഉണ്ടായിരുന്നു.

സദാനന്ദനെയും കൊച്ചുമകൻ ധൻജിത്തിനെയും ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ പരിക്കേറ്റ മറ്റ് അഞ്ചുപേരെ സ്വകാര്യ ആശുപത്രിയിൽ പ്രവേശിപ്പിച്ചു. കാറിന്റെ നിയന്ത്രണം വിടാനുള്ള കാരണം വ്യക്തമല്ല.