ബൈക്കിടിച്ച് റോഡിൽ കിടന്ന വയോധിക രക്തം വാർന്ന് മരിച്ചു; സംഭവം കോഴിക്കോട് മുക്കത്ത്

കോഴിക്കോട്: മുക്കത്ത് ബൈക്ക് ഇടിച്ച് വയോധിക മരിച്ചു. മണാശ്ശേരി സ്വദേശി കദീജയാണ് മരിച്ചത്. ഇന്ന് രാവിലെ 9 മണിയോടെ മുക്കം കരിയകുളങ്ങരയിലായിരുന്നു അപകടം.

റോഡ് മുറിച്ച് കടക്കുന്നതിനിടെ ബൈക്ക് ഇടിക്കുകയായിരുന്നു. സഹായം ലഭിക്കാതെ 10 മിനിറ്റോളം വയോധിക റോഡിൽ കിടക്കേണ്ടിവന്നു. തലയ്ക്ക് ഗുരുതരമായി പരിക്കേറ്റ കദീജയെ മുക്കത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.