ഡൽഹി: നമ്മുടെ പാദങ്ങള്ക്കടിയിലുള്ള ഈ ഭൂമി മണിക്കൂറില് 1,670 കിലോമീറ്റർ വേഗതയില് (ഭൂമധ്യരേഖയില്) കറങ്ങിക്കൊണ്ടിരിക്കുകയാണ്.
മിക്ക യുദ്ധവിമാനങ്ങളെക്കാളും വേഗതയുള്ള ഈ ഭ്രമണം പക്ഷേ നമ്മള് അറിയുന്നേയില്ല. കാറ്റോ തലകറക്കമോ പ്രകമ്പനമോ ഇല്ലാതെ എല്ലാം നിശ്ചലമായി തോന്നുന്നത് എന്തുകൊണ്ടാണെന്നത് കൗതുകകരമായ ഒരു ചോദ്യമാണ്. ഇതിന്റെ ഉത്തരം ലളിതമാണ്.
നമ്മള് ഒരു വിമാനത്തിലോ ട്രെയിനിലോ സുഗമമായി യാത്ര ചെയ്യുമ്പോള് വേഗത അറിയാത്തതിന് സമാനമാണിത്. ഭൂമിയോടൊപ്പം അതിന്റെ അന്തരീക്ഷവും സമുദ്രങ്ങളും കെട്ടിടങ്ങളും നിങ്ങളും ഒരേ വേഗതയില് കറങ്ങുന്നതുകൊണ്ടാണ് മാറ്റങ്ങള് ഒന്നും അനുഭവപ്പെടാത്തത്.
നമ്മുടെ ഇന്ദ്രിയങ്ങള് രൂപപ്പെട്ടിരിക്കുന്നത് വേഗതയോ ദിശയോ പെട്ടെന്ന് മാറുമ്പോള് മാത്രം തിരിച്ചറിയാനാണ്. ഉദാഹരണത്തിന്, ഒരു കാർ പെട്ടെന്ന് ബ്രേക്ക് ഇടുമ്പോഴോ വളവു തിരിയുമ്പോഴോ മാത്രമാണ് ചലനത്തില് വന്ന വ്യത്യാസം നമ്മള് അറിയുന്നത്. എന്നാല് ഭൂമിയുടെ ഭ്രമണം കോടിക്കണക്കിന് വർഷങ്ങളായി അതിശയിപ്പിക്കുന്ന വിധം സുഗമവും സ്ഥിരവുമാണ്. വേഗതയില് വ്യതിയാനങ്ങളില്ലാത്തതിനാല് നമ്മുടെ ശരീരത്തിന് ഈ നിരന്തരമായ ചലനം തിരിച്ചറിയാൻ സാധിക്കില്ല. ഒപ്പം ഭൂമിയുടെ ശക്തമായ ഗുരുത്വാകർഷണം നമ്മെ ഉപരിതലത്തില് ഉറപ്പിച്ചു നിർത്തുന്നതിനാല് ഭ്രമണം മൂലമുണ്ടാകുന്ന നേരിയ പുറന്തള്ളല് ശക്തിയും നാം അറിയുന്നില്ല.
Whatsapp Group 1 | Whatsapp Group 2 |Telegram Group
ഭൂമി കറങ്ങുന്നതായി നമുക്ക് അനുഭവപ്പെടുന്നില്ലെങ്കിലും ശാസ്ത്രീയമായി അത് തെളിയിക്കാൻ നിരവധി മാർഗങ്ങളുണ്ട്. വടക്കൻ-തെക്കൻ അർദ്ധഗോളങ്ങളില് ചുഴലിക്കാറ്റുകള് വിപരീത ദിശകളില് കറങ്ങുന്നത് ഭൂമിയുടെ ഭ്രമണത്തിന്റെ ഫലമായാണ്. ഇതിനെ ‘കൊറിയോലിസ് പ്രഭാവം’ എന്ന് വിളിക്കുന്നു. പാരീസിലെ മ്യൂസിയത്തില് പ്രദർശിപ്പിച്ചിട്ടുള്ള ‘ഫൂക്കോ പെൻഡുലം’ ഇതിന് മറ്റൊരു ഉദാഹരണമാണ്. ആടിക്കൊണ്ടിരിക്കുന്ന പെൻഡുലത്തിന്റെ ദിശ പതുക്കെ മാറുന്നത് അതിനടിയിലുള്ള ഭൂമി കറങ്ങുന്നതുകൊണ്ടാണ്. പൈലറ്റുമാരും മിസൈല് സംവിധാനങ്ങളും തങ്ങളുടെ പാത കൃത്യമായി കണക്കാക്കുമ്പോള് ഭൂമിയുടെ ഈ കറക്കം കൂടി പരിഗണിക്കേണ്ടതുണ്ട്.
4.5 ബില്യണ് വർഷങ്ങളായി നമ്മുടെ ഗ്രഹം ഈ കറക്കം തുടരുകയാണ്. പ്രകൃതി ഒരുക്കിയ ഈ അത്ഭുതകരമായ സ്ഥിരതയാണ് ഭൂമിയില് ജീവൻ സുരക്ഷിതമായി നിലനില്ക്കാൻ സഹായിക്കുന്നത്. പ്രഭാതവും പ്രദോഷവും മാറിമാറി വരുന്നതും ഋതുഭേദങ്ങള് ഉണ്ടാകുന്നതുമെല്ലാം ഈ നിശബ്ദമായ കറക്കത്തിന്റെ ഫലമാണ്. നമ്മുടെ ഗ്രഹം ഇത്രയും വേഗതയില് സഞ്ചരിച്ചിട്ടും നമ്മള് അതറിയാത്തത് പ്രപഞ്ചത്തിലെ ഏറ്റവും വലിയ വിസ്മയങ്ങളില് ഒന്നാണ്.
