കോഴിക്കോട്: കോഴിക്കോട് വടകര പാസ്പോർട്ട് ഓഫീസിന് സമീപം നിയന്ത്രണം വിട്ട ഇന്നോവ കാർ കടയിലേക്ക് ഇടിച്ച് കയറി അപകടം. അപകടത്തിൽ യുവതിക്ക് സാരമായ പരിക്കേറ്റു . ഇന്ന് രാവിലെ എട്ട് മണിയോടെയായിരുന്നു സംഭവം. വടകര കരിമ്പനപ്പാലം സ്വദേശിനി ദിവ്യയ്ക്കാണ് (38) പരിക്കേറ്റത്.
റോഡരികില് നിർത്തിയിട്ടിരുന്ന ഓട്ടോറിക്ഷയിലും സ്കൂട്ടറിലും ഇടിച്ച ശേഷമാണ് കാർ സമീപത്തെ അടച്ചിട്ട കടയിലേക്ക് ഇടിച്ച് കയറിയത്. തൊട്ടടുത്ത ചായക്കടയില് നിന്നും ചായ കുടിച്ച് ഇറങ്ങുകയായിരുന്നു ദിവ്യ . ദിവ്യയെ ഉടൻ തന്നെ വടകര സഹകരണ ആശുപത്രിയില് പ്രവേശിപ്പിച്ചു. പരിക്ക് സാരമായതിനാല് പിന്നീട് വിദഗ്ധ ചികിത്സയ്ക്കായി കോഴിക്കോട്ടെ ആശുപത്രിയിലേക്ക് മാറ്റി.
രാവിലെയായതിനാല് കൂടുതല് ആളുകള് സ്ഥലത്തില്ലാതിരുന്നതിനാല് വലിയൊരു ദുരന്തം ഒഴിവായി. അപകടത്തില് ഓട്ടോറിക്ഷയ്ക്കും സ്കൂട്ടറിനും കാറിനും വലിയ തോതില് നാശനഷ്ടങ്ങള് സംഭവിച്ചിട്ടുണ്ട്.
Whatsapp Group 1 | Whatsapp Group 2 |Telegram Group