കോണ്ഫിഡന്റ് ഗ്രൂപ്പ് ചെയർമാൻ ഡോ. സിജെ റോയിയുടെ അപ്രതീക്ഷിത വിയോഗത്തിന്റെ നടുക്കത്തിലാണ് ബെംഗളൂരു. തന്റെ മരണത്തിന് മുമ്പ് അമ്മയോട് സംസാരിക്കണമെന്ന് റോയി ആഗ്രഹം പ്രകടിപ്പിച്ചിരുന്നതായി പോലീസ് റിപ്പോർട്ടുകൾ വ്യക്തമാക്കുന്നു. അശോക് നഗര് പൊലീസ് സ്റ്റേഷനില് കോണ്ഫിഡന്റ് ഗ്രൂപ്പ് എംഡി ടിഎ. ജോസഫ് സമര്പ്പിച്ച പരാതിയിലാണു സംഭവ ദിവസത്തെക്കുറിച്ചുള്ള കൂടുതല് വിവരങ്ങള് ഉള്ളത്.
കഴിഞ്ഞ വെള്ളിയാഴ്ച ഉച്ചയ്ക്ക് മൂന്നുമണിയോടെ, ആദായ നികുതി വകുപ്പ് ഉദ്യോഗസ്ഥര്ക്ക് മൊഴി നല്കാനായി ടി.എ.ജോസഫിനൊപ്പം റോയ് ഓഫിസിലെത്തി. പിന്നാലെ തന്റെ ക്യാബിനിലേക്ക് പോയ റോയി അമ്മയോട് സംസാരിക്കണമെന്ന് ജോസഫിനോട് ആഗ്രഹം പ്രകടിപ്പിക്കുകയും ചെയ്തു. എന്നാല് പുറത്തേക്കിറങ്ങിയ ജോസഫ് തിരികെ എത്തിയപ്പോള് ക്യാബിനിലേക്ക് കയറാന് സെക്യൂരിറ്റി സമ്മതിച്ചില്ല. ആരെയും ക്യാബിനിലേക്ക് കയറ്റി വിടരുതെന്ന് റോയ് അറിയിച്ചെന്നായിരുന്നു വിശദീകരണം. 10 മിനിറ്റിന് ശേഷം ജോസഫ് ക്യാബിന് മുന്നിലെത്തി മുട്ടിയെങ്കിലും അകത്തുനിന്നും പ്രതികരണമുണ്ടായില്ല. കതക് ഉള്ളില് നിന്നും ലോക്കിട്ട നിലയിലായിരുന്നു. കതക് തകര്ത്ത് ഉള്ളില് കയറിയപ്പോള് ഷര്ട്ടില് നിറയെ ചോരയുമായി കസേരയില് ഇരിക്കുന്ന നിലയിലായിരുന്നു റോയി. പള്സ് ഇല്ലെന്ന് മെഡിക്കല് സ്റ്റാഫ് സ്ഥിരീകരിച്ചു. ഉടന് തന്നെ ആംബുലന്സ് വിളിച്ചു ബെംഗളൂരുവിലെ നാരായണ ആശുപത്രിയിലെത്തിക്കുകയായിരുന്നു.
റോയിയുടെ മരണത്തില് വിശദമായ അന്വേഷണം നടത്തണമെന്നാണു സ്ഥാപനത്തിന്റെ ആവശ്യം. കടുംകൈ ചെയ്യാന് റോയിയെ പ്രേരിപ്പിച്ച തരത്തിലുള്ള സമ്മര്ദം ഉണ്ടായിരുന്നോ എന്ന് കണ്ടെത്തണമെന്നും പരാതിയില് ആവശ്യപ്പെട്ടിട്ടുണ്ട്. ആദായനികുതി വകുപ്പ് ഉദ്യോഗസ്ഥര്ക്കെതിരെ ഗുരതുരമായ ആരോപണങ്ങളാണു റോയിയുടെ കുടുംബം ഉന്നയിച്ചത്. ഐ-ടി ഉദ്യോഗസ്ഥര് ഡിസംബറില് 2 തവണ ഓഫിസ് സന്ദര്ശിച്ചിരുന്നു.
Whatsapp Group 1 | Whatsapp Group 2 |Telegram Group
റെയ്ഡുകള്ക്കിടെ റോയി രേഖകള് സമര്പ്പിക്കുകയും ചെയ്തിരുന്നു. തുടര്ന്ന് വെള്ളിയാഴ്ച ഉദ്യോഗസ്ഥര് വീണ്ടും എത്തി. ഡിസംബര് അവസാന വാരം റെയ്ഡിനായി എത്തുമെന്ന് റോയിയെ മുന്പ് അറിയിച്ചിരുന്നതായും അദ്ദേഹം അവര്ക്കായി കാത്തിരിക്കുകയായിരുന്നുവെന്നും കുടുംബം പറഞ്ഞു. റെയ്ഡുകളെ തുടര്ന്ന് താന് അനുഭവിച്ചിരുന്ന ഉത്കണ്ഠയും മാനസിക സമ്മര്ദ്ദവും അദ്ദേഹം പങ്കുവെച്ചിരുന്നതായി റോയിയുമായി അടുത്തവര് തങ്ങളുടെ അനുശോചന സന്ദേശത്തില് പറയുന്നു.
സിജെ. റോയിയുടെ സംസ്കാരം ഇന്ന് വൈകിട്ട് നാല് മണിക്ക് നടക്കും. ബന്നാർഘട്ടയിലെ നേച്ചർസ് കാസ്കേഡില് ഉച്ചയ്ക്ക് രണ്ട് മണി വരെ പൊതുദർശനം തുടരും. സെന്റ് ജോസഫ്സ് സിറോ മലബാർ പള്ളിയിലെ അന്ത്യശുശ്രൂഷകള്ക്ക് ശേഷം വൻ ജനവലിയുടെ സാന്നിധ്യത്തിലാകും സംസ്കാര ചടങ്ങുകള് നടക്കുക.
