പുതിയ വസ്ത്രങ്ങള് വാങ്ങി വീട്ടിലെത്തിയാലുടൻ അത് അണിഞ്ഞ് നോക്കുന്ന ശീലം പലർക്കുമുണ്ട്. മറ്റ് ചിലരാണെങ്കില് കടയില് നിന്ന് വാങ്ങുന്ന വസ്ത്രം കഴുകാതെ തന്നെ പാകം വരുത്തി ഉപയോഗിക്കും.
എന്നാല് ഇങ്ങനെ ചെയ്യുന്നത് വളരെയധികം ദോഷം ചെയ്യും.
പല ഘട്ടങ്ങളിലായി വിവിധ മെഷീനുകളിലൂടെ കയറിയിറങ്ങി വരുന്ന തുണിത്തരങ്ങളില് ധാരാളം രാസ പദാർത്ഥങ്ങളും പൊടിപടലങ്ങളും പറ്റിയിരിപ്പുണ്ടാകാം. ഇവ ചർമ്മത്തിലെ ചെറിയ സുഷിരങ്ങളിലൂടെ ശരീരത്തിന് ഉള്ളിലേക്ക് പ്രവേശിച്ച് വലിയ ആരോഗ്യ പ്രശ്നങ്ങള് ഉണ്ടാകാനുള്ള സാദ്ധ്യതയുണ്ട്. അലർജി, ശ്വാസകോശപ്രശ്നങ്ങള്, ചർമ്മ രോഗങ്ങള് എന്നിവയ്ക്കും ഇവ കാരണമാകാം.
Whatsapp Group 1 | Whatsapp Group 2 |Telegram Group
നാഷണല് ലൈബ്രറി ഓഫ് മെഡിസിനില് പ്രസിദ്ധീകരിച്ച പഠനമനുസരിച്ച്, ചില പുതിയ വസ്ത്രങ്ങളില് സ്റ്റാഫൈലോകോക്കസ് ഓറിയസ് പോലുള്ള ബാക്ടീരിയകള് അടങ്ങിയിരിക്കാം. ഇത് ചർമ്മത്തില് അണുബാധകള്ക്കും മറ്റ് ആരോഗ്യ പ്രശ്നങ്ങള്ക്കും കാരണമാകും.
വസ്ത്രങ്ങള് നിർമ്മിക്കുന്നത് വലിയ ഫാക്ടറികളിലാണ്. വസ്ത്ര നിർമ്മാതാക്കള് തുണിയുടെ രൂപം, ഘടന, ഈട് എന്നിവ വർദ്ധിപ്പിക്കുന്നതിന് ഉല്പാദന പ്രക്രിയയില് വിവിധ രാസവസ്തുക്കള് ഉപയോഗിക്കാറുണ്ടെന്ന് പറയപ്പെടുന്നു.
ഉദാഹരണത്തിന്, ചുളിവുകള് തടയാൻ ഫോർമാല്ഡിഹൈഡ് പോലെ അലർജി പ്രതിപ്രവർത്തനങ്ങള്ക്ക് കാരണമാകുന്ന ചായങ്ങള് ഉപയോഗിക്കാറുണ്ട്. അതിനാല് ഇവ മൂലമുണ്ടാകുന്ന പ്രശ്നങ്ങള് ഒഴിവാക്കാൻ സോപ്പ് ഉപയോഗിച്ച് കഴുകി വെയിലത്തിട്ട് ഉണക്കിയെടുത്ത ശേഷം മാത്രമെ പുതിയ വസ്ത്രങ്ങള് ഉപയോഗിക്കാൻ പാടുള്ളു. കുട്ടികളുടെ കാര്യത്തില് ഇത് പ്രത്യേകം ശ്രദ്ധിക്കണം.
