ദമ്പതികളെ ക്രൂരമായി മർദിച്ച സംഭവം ; കർശന നടപടി സ്വീകരിക്കുമെന്ന് കെ കെ ശൈലജ

സ്വന്തം ലേഖിക

തിരുവനന്തപുരം: വയനാട്ടിൽ തമിഴ് ദമ്പതികൾ ക്രൂര മർദ്ദനത്തിനിടയായ സംഭവത്തിൽ കർശന നടപടി സ്വീകരിക്കുമെന്ന് ആരോഗ്യ മന്ത്രി കെകെ ശൈലജ. വിദ്യാഭ്യാസ രംഗത്ത് ഇത്രയേറെ പുരോഗതി നേടിയ കേരളത്തിന് ഇത്തരം സംഭവങ്ങൾ ഒട്ടും ഭൂഷണമല്ലെന്നും, സംഭവം അത്യന്തം വേദനാജനകമാണെന്നും മന്ത്രി പറഞ്ഞു.

ഇതുപോലുള്ള ആൾക്കൂട്ട ആക്രമണങ്ങൾക്കെതിരെ സമൂഹ മനസാക്ഷി ഉണരേണ്ടതാണെന്നും, ഇത്തരം സംഭവങ്ങൾ ഒരിക്കലും അംഗീകരിക്കാൻ കഴിയില്ലെന്നും ദമ്പതികൾക്ക് വനിത ശിശുവികസന വകുപ്പിന്റെ എല്ലാ പിന്തുണയുമറിയിക്കുന്നുവെന്നും മന്ത്രി വ്യക്തമാക്കി. സംഭവത്തിൽ വനിതാ കമ്മീഷനും കേസ് എടുത്തിരുന്നു.

ഇന്നലെയാണ് അമ്പലവയലിൽവെച്ച് തമിഴ് ദമ്പതികളെ സജീവാനന്ദൻ എന്നയാളാണ് ക്രൂരമായി മർദ്ദിച്ചത്. സംഭവത്തിന്റെ ദൃശ്യങ്ങൾ സാമൂഹ്യമാധ്യമങ്ങളിൽ വ്യാപകമായി പ്രചരിച്ചിരുന്നു.

ആക്രമണം കണ്ട് നിന്നവരാണ് മർദ്ദനത്തിന്റെ ദൃശ്യങ്ങൾ ഫോണിൽ പകർത്തി സാമൂഹ്യമാധ്യമങ്ങളിൽ പങ്കുവച്ചത്. കോൺഗ്രസ് പ്രവർത്തകനാണ് കേസിലെ പ്രതിയായ സജീവാനന്ദൻ. ഇയാൾ ഇപ്പോൾ ഒളിവിലാണ്.