മുനമ്പത്ത് താമസിക്കുന്നവരുടെ ഭൂനികുതി സ്വീകരിക്കാന് സർക്കാരിന് അനുമതി നൽകി ഹൈക്കോടതി .മുനമ്പം വഖഫ് ഭൂമിയല്ലെന്ന് ഹൈക്കോടതി ഡിവിഷന് ബെഞ്ച് നേരത്തെ ഉത്തരവിട്ടിരുന്നു ,ഇതിന് പിന്നാലെയാണ് കേസില് അന്തിമ വിധി വരുന്നതു വരെ താല്ക്കാലിക അടിസ്ഥാനത്തില് ഭൂനികുതി സർക്കാരിന് സ്വീകരിക്കാം എന്ന് കോടതി നിര്ദേശം നൽകിയിരിക്കുന്നത് .
ഭൂനികുതി സ്വീകരിക്കാന് റവന്യു അധികൃതര്ക്കു നിര്ദേശം നല്കണമെന്ന് ആവശ്യപ്പെട്ട് ഭൂസംരക്ഷണ സമിതിയുടെ ഉള്പ്പെടെ ഹര്ജികളാണ് കോടതിയുടെ മുന്പാകെയുള്ളത്. മുനമ്പത്തേത് വഖഫ് ഭൂമിയല്ലെന്ന് ഡിവിഷന് ബെഞ്ച് ഉത്തരവിട്ടതിനെ തുടര്ന്നു ഭൂസംരക്ഷണ സമിതി ഉള്പ്പെടെ നല്കിയ ഹര്ജികള് നേരത്തെ പരിഗണിക്കണമെന്ന് സര്ക്കാര് ആവശ്യപ്പെട്ടിരുന്നു. തുടര്ന്നാണ് ജസ്റ്റിസ് സി.ജയചന്ദ്രന് ഇന്ന് ഇക്കാര്യത്തില് ഇടക്കാല നിര്ദേശം നല്കിയത്.
1950ലെ ആധാരപ്രകാരം ഇത് ഫറൂഖ് കോളേജിനുള്ള ദാനമാണെന്നും ഭൂമി തിരിച്ചെടുക്കാനുള്ള വ്യവസ്ഥ വന്നതോടെ ഭൂമി വഖഫ് അല്ലാതായെന്നും നേരത്തെ കോടതി വ്യക്തമാക്കിയിരുന്നു. അതേസമയം വഖഫ് ഭൂമിയല്ലെന്ന ഹൈക്കോടതി ഡിവിഷന് ബെഞ്ചിന്റെ ഉത്തരവിനെതിരെ വഖഫ് സംരക്ഷണ സമിതി സുപ്രീംകോടതിയെ സമീപിച്ചിട്ടുണ്ട്.
