ന്യൂഡൽഹി: സ്വർണത്തിന്റെയും വെള്ളിയുടെയും അടിസ്ഥാന ഇറക്കുമതി വില കുറച്ച്‌ കേന്ദ്രസർക്കാർ. രാജ്യാന്തര വിപണിയില്‍ സ്വർണ-വെള്ളി വിലകളിലുണ്ടാകുന്ന ചാഞ്ചാട്ടങ്ങള്‍ക്കിടയിലാണ് ഇവയുടെ വില നിയന്ത്രിക്കാനുള്ള നിർണായക നടപടി.
സ്വർണത്തിന് 10 ഗ്രാമിന് 42 ഡോളറും വെള്ളിക്ക് കിലോയ്ക്ക് 107 ഡോളറുമാണ് കുറച്ചത്. ആഭ്യന്തര വ്യാപാരം പ്രോത്സാഹിപ്പിക്കുന്നതിനും വിലകുറയ്ക്കുന്നത് നീക്കം സഹായിക്കും.
ഇറക്കുമതി ചെയ്യുന്ന ഉല്‍പ്പന്നങ്ങള്‍ക്ക് കസ്റ്റംസ് തീരുവ കണക്കാക്കാൻ ഉപയോഗിക്കുന്ന അടിസ്ഥാന വിലയാണിത്. സർക്കാർ ഓരോ 15 ദിവസത്തിലും ഈ അടിസ്ഥാന വില പുതുക്കാറുണ്ട്. അടിസ്ഥാന വില കുറയ്ക്കുന്നത് ഇറക്കുമതിക്കാർക്കുള്ള നികുതിഭാരം കുറയ്ക്കും, ഇത് ആഭ്യന്തര വിപണിയില്‍ വില സ്ഥിരപ്പെടുത്താൻ സഹായിക്കും.
Whatsapp Group 1 | Whatsapp Group 2 |Telegram Group
ലോകത്തിലെ രണ്ടാമത്തെ വലിയ സ്വർണ്ണ ഇറക്കുമതി രാജ്യം
ലോകത്തിലെ ഏറ്റവും വലിയ സ്വർണ്ണ ഉപഭോക്താവും രണ്ടാമത്തെ വലിയ ഇറക്കുമതി രാജ്യവുമാണ് ഇന്ത്യ. ക്രൂഡ് ഓയിലിന് ശേഷം ഇന്ത്യയുടെ ഏറ്റവും വലിയ ഇറക്കുമതി ഉല്‍പ്പന്നങ്ങളില്‍ ഒന്ന് കൂടിയാണ് സ്വർണം.
പ്രതിവർഷം 800-1000 ടണ്‍ സ്വർണ്ണമാണ് ഇന്ത്യ ഇറക്കുമതി ചെയ്യുന്നത്. രാജ്യത്ത് ആവശ്യമായ സ്വർണം ആഭ്യന്തരമായി ഉത്പാദിപ്പിക്കപ്പെടുന്നില്ലെന്നത് തന്നെയാണ് ഈ അമിത ഇറക്കുമതിയിലേക്ക് നയിക്കുന്നത്.
ഇന്ത്യ പ്രതിവർഷം 32 ബില്യണ്‍ ഡോളറിന്റെ ആഭരണങ്ങള്‍ കയറ്റുമതി ചെയ്യുന്നുണ്ടെങ്കിലും, അറ്റ വ്യാപാരക്കമ്മി ഇപ്പോഴും 23 ബില്യണ്‍ ഡോളറായി തുടരുകയാണ്. ഈ ഭാരം കുറയ്ക്കുന്നതിനായി, മൂല്യവർദ്ധിത കയറ്റുമതി പ്രോത്സാഹിപ്പിക്കുന്നതിന് സർക്കാർ ഇറക്കുമതി തീരുവ 15% ല്‍ നിന്ന് 6% ആയി കഴിഞ്ഞ വർഷം കുറച്ചിരുന്നു.
കൂടാതെ, സ്വർണ്ണ ധനസമ്ബാദന പദ്ധതികള്‍ അവതരിപ്പിക്കുകയും അലോയ് ഇറക്കുമതിക്ക് നിയന്ത്രണങ്ങള്‍ ഏർപ്പെടുത്തുകയും സോവറിൻ ഗോള്‍ഡ് ബോണ്ടുകള്‍ പോലുള്ള ബദല്‍ മാർഗ്ഗങ്ങള്‍ പ്രോത്സാഹിപ്പിക്കുകയും ചെയ്തിട്ടുണ്ട്. എന്നിരുന്നാലും, ഉപഭോഗ രീതികളില്‍ മാറ്റം വരുന്നത് വരെ, ഇന്ത്യയുടെ സ്വർണ്ണത്തോടുള്ള സ്നേഹം സാമ്ബത്തിക സ്ഥിരതയെ തടസ്സപ്പെടുത്തിക്കൊണ്ട് തിളങ്ങിനില്‍ക്കും.
