യൂണിയൻ ഓഫീസിൽ ഉത്തരക്കടലാസും അധ്യാപകന്റെ സീലും മദ്യക്കുപ്പികളും മാരകായുധങ്ങളും ; യൂണിവേഴ്‌സിറ്റി കോളേജ് ഭീകര ക്യാമ്പോ ?

സ്വന്തം ലേഖകൻ

തിരുവനന്തപുരം: യൂണിവേഴ്സിറ്റി കോളേജിലെ എസ്.എഫ്.ഐ യൂണിയൻ ഓഫീസിലും സർവകലാശാലയുടെ ഉത്തരക്കടലാസ് കെട്ടുകൾ കണ്ടെത്തി.കോളേജിലെ കത്തിക്കുത്തിന്റെ പശ്ചാത്തലത്തിൽ, എസ്.എഫ്.ഐയുടെ ഇടിമുറിയായി പ്രവർത്തിക്കുന്ന യൂണിയൻ ഓഫീസ് പിടിച്ചെടുത്ത് ക്ലാസ് മുറിയാക്കാൻ കോളേജ് വിദ്യാഭ്യാസ വകുപ്പ് തീരുമാനിച്ചിരുന്നു. ഇതേ തുടർന്ന് കോളേജ് ജീവനക്കാർ ഇന്നലെ മുറി ഒഴിപ്പിക്കുന്നതിനിടെയാണ് എസ്.എഫ്.ഐ യൂണിറ്റ് സെക്രട്ടറിയും പ്രസിഡന്റും ഉപയോഗിക്കുന്ന മുറിയിൽ നിന്ന് റോൾ നമ്പർ എഴുതിയതും അല്ലാത്തതുമായ കേരള സർവകലാശാലയുടെ ഉത്തരക്കടലാസ് കെട്ടുകൾ കണ്ടെത്തിയത്. കഴിഞ്ഞ ദിവസം ഇവിടെ നിന്ന് മദ്യ കുപ്പിയും കത്തിയും പൊലീസ് കണ്ടെടുത്തിരുന്നു. മുറിയിൽ സ്ഥാപിച്ചിരുന്ന കൊടി തോരണങ്ങളും ഫ്‌ളക്‌സും അടക്കമുള്ള കാര്യങ്ങൾ നീക്കം ചെയ്തശേഷം മുറി പൂട്ടിയിരിക്കുകയാണ്.ഉടനെ ഇത് ക്ലാസ് മുറിയായി ഉപയോഗിക്കുമെന്ന് കോളേജ് അധികൃതർ വ്യക്തമാക്കി.

കോളേജിൽ നടന്ന വധ ശ്രമക്കേസിൽ അറസ്റ്റിലായ യൂണിയൻ നേതാവ് ശിവരഞ്ജിത്തിന്റെ വീട്ടിൽ കഴിഞ്ഞ ദിവസം പൊലീസ് നടത്തിയ പരിശോധനയിലും സർവകലാശാല പരീക്ഷയുടെ ഉത്തരക്കടലാസ് കെട്ടുകളും ഫിസിക്കൽ എഡ്യൂക്കേഷൻ ഡയറക്ടറുടെ സീലും കണ്ടെടുത്തിരുന്നു.