സ്വര്‍ണപ്പാളി വിവാദം: ശ്രീകോവിലിന് പുതിയ വാതില്‍ നിര്‍മ്മിക്കാൻ ആവശ്യപ്പെട്ടത് ദേവസ്വം; അത് ഏറ്റെടുത്തത് അഞ്ച് സുഹൃത്തുക്കള്‍ ചേർന്ന്; ആരോപണങ്ങള്‍ നിഷേധിച്ച്‌ ഉണ്ണികൃഷ്ണൻ പോറ്റി

തിരുവനന്തപുരം: ശബരിമല സ്വർണപ്പാളി വിവാദത്തില്‍ തനിക്ക് എതിരായ ആരോപണങ്ങള്‍ എല്ലാം നിഷേധിച്ച്‌ സ്പോണ്‍സർ ഉണ്ണികൃഷ്ണൻ പോറ്റി.

ശ്രീകോവിലിന് പുതിയ വാതില്‍ നിർമ്മിക്കാൻ ആവശ്യപ്പെട്ടത് ദേവസ്വമാണെന്നും ഉണ്ണികൃഷ്ണൻ പോറ്റി വെളിപ്പെടുത്തി. നിലവിലുള്ള വാതില്‍ അടയ്ക്കാൻ ബുദ്ധിമുട്ടാണെന്ന് കാണിച്ചായിരുന്നു തന്നെ സമീപിച്ചതെന്നും അഞ്ച് സുഹൃത്തുക്കള്‍ ചേർന്നാണ് അത് ഏറ്റെടുത്തതെന്നും അദ്ദേഹം പറഞ്ഞു.

ബെംഗളൂരു സ്വദേശിയായ ഗോവർദ്ധൻ ആണ് എല്ലാ ചെലവും വഹിക്കാം എന്ന് ഏറ്റെടുത്തത്. മറ്റാരും അതിനായി സ്വർണമോ പണമോ ഉപയോഗിച്ചിട്ടില്ല.

വാതില്‍ പാളി നിർമ്മിച്ചതിനു ശേഷം ചെന്നൈയില്‍ തന്നെ ഒരു ദിവസം പൂജ നടത്തി എന്നും ഉണ്ണികൃഷ്ണൻ പോറ്റി പറഞ്ഞു. പോകുന്ന വഴിയില്‍ നടൻ ജയറാമിന്റെ വീട്ടില്‍ കയറിയത് വിശ്രമത്തിന് ആയിരുന്നുവെന്നും അദ്ദേഹം വ്യക്തമാക്കി.