ആലപ്പുഴ: മുതിർന്ന സിപിഎം നേതാവ് ജി സുധാകരനെതിരെ സമൂഹമാദ്ധ്യമത്തിലൂടെ മോശം പരാമർശം നടത്തിയ സിപിഎം ലോക്കല്‍ കമ്മിറ്റിയംഗം അറസ്റ്റില്‍.
അമ്പലപ്പുഴ കിഴക്ക് ലോക്കല്‍ കമ്മിറ്റിയംഗം കരുമാടി യമുന ഭവനില്‍ മിഥുൻ മോഹൻ (27) ആണ് അറസ്റ്റിലായത്. ശേഷം ജാമ്യത്തില്‍ വിട്ടയച്ചു.
ഡിവൈഎഫ്‌ഐ മേഖലാ ജോയിന്റ് സെക്രട്ടറിയും അമ്പലപ്പുഴ ക്ഷേത്രത്തിലെ താത്‌കാലിക ജീവനക്കാരനുമാണ് മിഥുൻ. അസഭ്യം പറയുക, അപകീർത്തിപ്പെടുത്തുക, ഇലക്‌ട്രോണിക് മാദ്ധ്യമത്തിലൂടെ അസഭ്യപരാമർശം നടത്തുക തുടങ്ങിയ കുറ്റങ്ങളാണ് ഇയാള്‍ക്കെതിരെ ചുമത്തിയിരിക്കുന്നത്.
Whatsapp Group 1 | Whatsapp Group 2 |Telegram Group
ലഹരിക്കെതിരെ കോണ്‍ഗ്രസിന്റെ മുതിർന്ന നേതാവ് രമേശ് ചെന്നിത്തല ആലപ്പുഴ കടപ്പുറത്ത് നടത്തിയ സമൂഹനടത്തത്തെ അഭിനന്ദിച്ച്‌ ജി സുധാകരൻ ഫേസ്‌ബുക്കില്‍ പോസ്റ്റ് ഇട്ടിരുന്നു. ഇതിനുതാഴെയാണ് മിഥുൻ അസഭ്യപരാമർശങ്ങള്‍ നടത്തിയത്.
തുടർന്ന് ജി സുധാകരൻ അമ്പലപ്പുഴ പൊലീസ് സ്റ്റേഷനില്‍ നേരിട്ടെത്തി പരാതി നല്‍കുകയായിരുന്നു. മിഥുൻ ക്ഷേത്ര ഭരണ ചട്ടങ്ങളുടെ ലംഘനം നടത്തിയതായും പരാതിയില്‍ പറയുന്നു. കമന്റിന്റെ സ്ക്രീൻഷോട്ടുകള്‍ ഉള്‍പ്പെടെയാണ് ജി സുധാകരൻ പരാതി നല്‍കിയത്. ഇതിനുപിന്നാലെ ഫേസ്‌ബുക്കില്‍ നിന്ന് പ്രതിയുടെ കമന്റ് അപ്രത്യക്ഷമായിരുന്നു.
