ദുര്‍ഗന്ധം വമിച്ചതിനെ തുടര്‍ന്ന് പരിശോധന; വാഴത്തോട്ടത്തില്‍ നിന്ന് കണ്ടെത്തിയത് മൂന്ന് ദിവസം പഴക്കമുള്ള മൃതദേഹം; അന്വേഷണം ആരംഭിച്ച്‌ പോലീസ്

തിരുവനന്തപുരം: വെഞ്ഞാറമൂട്ടില്‍ മൂന്നുദിവസം പഴക്കമുള്ള മൃതദേഹം കണ്ടെത്തിയ സംഭവത്തില്‍ പോലീസ് അന്വേഷണം ആരംഭിച്ചു.

കരമന സ്വദേശി സജീവിനെയാണ് മരിച്ച നിലയില്‍ കണ്ടെത്തിയത്. മാണിക്യമംഗലത്തെ വാഴത്തോട്ടത്തിലാണ് മൃതദേഹം കണ്ടെത്തിയത്. മരണകാരണം വ്യക്തമല്ല. പോസ്റ്റ്മോർട്ടം റിപ്പോർട്ട് വന്നതിന് ശേഷമേ കൂടുതല്‍ വിവരങ്ങള്‍ വ്യക്തമാകൂവെന്ന് പോലീസ് അറിയിച്ചു.

കഴിഞ്ഞ മൂന്നുദിവസമായി സജീവിനെ കാണാനില്ലായിരുന്നു. വെഞ്ഞാറമൂട്ടിലെ ഒരു ആക്രികടയില്‍ ജോലി ചെയ്തുവരികയായിരുന്നു സജീവൻ. വെള്ളിയാഴ്ച വാഴത്തോട്ടത്തില്‍ നിന്ന് ദുർഗന്ധം വമിച്ചതിനെ തുടർന്ന് തൊട്ടടുത്തെ ഫാമിലെ ജീവനക്കാർ നടത്തിയ പരിശോധനയിലാണ് മൃതദേഹം കണ്ടെത്തിയത്.

പുരയിടത്തിലെ നീർച്ചാലില്‍ കമിഴ്ന്നുകിടക്കുന്ന നിലയിലായിരുന്നു മൃതദേഹം. ഉടൻ തന്നെ ഫാമിലെ ജീവനക്കാർ പോലീസില്‍ വിവരമറിയിച്ചു. സംഭവങ്ങളില്‍ കൂടുതല്‍ വിവരങ്ങള്‍ ലഭ്യമാകുന്നതിനായി പോലീസ് അന്വേഷണം ഊർജിതമാക്കി.