ബംഗളൂരു: ഓടുന്ന ട്രെയിനില്‍ ബാറും സ്പായും ജിംനേഷ്യവും ഫൈവ് സ്റ്റാര്‍ റെസ്റ്റോറന്‍റുമെല്ലാം ഉണ്ടെങ്കില്‍ എങ്ങനെയുണ്ടാകും?
അത്തരമൊരു ട്രെയിൻ കേരളത്തിലൂടെ കടന്നുപോകാറുണ്ടെന്ന് പറഞ്ഞാല്‍ നിങ്ങള്‍ വിശ്വസിക്കുമോ? എങ്കില്‍ സംഗതി സത്യമാണ്. അള്‍ട്രാ ലക്ഷ്വറി ട്രെയിനായ ഗോള്‍ഡൻ ചാരിയറ്റിനെ കുറിച്ചാണ് പറയുന്നത്. ഈ ട്രെയിനില്‍ മുകളില്‍ പറഞ്ഞ എല്ലാ സൗകര്യങ്ങളുമുണ്ട്.
ട്രാവല്‍ കണ്ടന്റുകള്‍ ചെയ്യാറുള്ള തന്യ ഖനിജോവ് അടുത്തിടെ ഗോള്‍ഡൻ ചാരിയറ്റില്‍ യാത്ര ചെയ്തതിന്റെ വീഡിയോ ഇൻസ്റ്റഗ്രാമില്‍ പങ്കുവെച്ചിരുന്നു. ഗോള്‍ഡൻ ചാരിയറ്റിന്റെ ഇന്റീരിയറും സവിശേഷതകളുമെല്ലാം ഈ വീഡിയോയില്‍ കാണാം. ഉച്ചഭക്ഷണത്തിനും അത്താഴത്തിനുമായി രണ്ട് പ്രത്യേക ഡൈനിംഗ് കാറുകള്‍ ഗോള്‍ഡൻ ചാരിയറ്റില്‍ ഉണ്ടെന്ന് തന്യ പറയുന്നു. രണ്ടിലും മനോഹരമായ ഇരിപ്പിടങ്ങള്‍, ടേബിള്‍വെയർ, ദക്ഷിണേന്ത്യയുടെ മാറിക്കൊണ്ടിരിക്കുന്ന പ്രകൃതിദൃശ്യങ്ങളുടെ കാഴ്ചകള്‍ പ്രദാനം ചെയ്യുന്ന വലിയ ജനാലകള്‍ എന്നിവ സജ്ജീകരിച്ചിട്ടുണ്ട്.
ഗോള്‍ഡൻ ചാരിയറ്റില്‍ നല്‍കുന്ന ഭക്ഷണത്തിന് അതിശയിപ്പിക്കുന്ന സ്വാദാണെന്നാണ് തന്യ പറയുന്നത്.
യാത്രക്കാർക്ക് ആഡംബര മുറികളും ഗോള്‍ഡൻ ചാരിയറ്റില്‍ സജ്ജീകരിച്ചിട്ടുണ്ട്. ഈ ട്രെയിനില്‍ 5 സ്റ്റാർ കാറ്ററിംഗ്, ഒരു ബാർ എന്നിവയുണ്ട്. ആഡംബരമായ മുറികളില്‍ മികച്ച ക്വാളിറ്റിയിലുള്ള കിടക്കകളും ഇന്റീരിയറുമാണുള്ളത്. പുഷ് ഡൗണ്‍ പ്ലഷ്, ഓവർ ഹെഡ് ഷവർ ഉള്‍പ്പെടെ രണ്ട് ഷവറുകള്‍ തുടങ്ങിയ സൗകര്യങ്ങളോട് കൂടിയ അറ്റാച്ച്‌ഡ് ബാത്ത്റൂമാണ് മുറികളില്‍ സജ്ജീകരിച്ചിരിക്കുന്നത്. യാത്രക്കാർക്ക് മസാജ് ചെയ്ത് വിശ്രമിക്കാൻ കഴിയുന്ന ഓണ്‍ബോർഡ് സ്പായും ജിംനേഷ്യവും എടുത്തുപറയേണ്ട സവിശേഷതകളാണെന്നും തന്യ പറയുന്നു.
Whatsapp Group 1 | Whatsapp Group 2 |Telegram Group
88 പേർക്ക് യാത്ര ചെയ്യാൻ സാധിക്കുന്ന ഗോള്‍ഡൻ ചാരിയറ്റില്‍ 44 ക്യാബിനുകളുണ്ട്. ഈ ട്രെയിനില്‍ സഞ്ചരിക്കാൻ ഒരാള്‍ക്ക് ഏകദേശം 4 ലക്ഷം രൂപയോളം ചെലവ് വരും. കർണാടക, തമിഴ്നാട്, ഗോവ, കേരളം എന്നീ സംസ്ഥാനങ്ങള്‍ പര്യവേക്ഷണം ചെയ്യുന്ന മൂന്ന് യാത്രാ പാക്കേജുകള്‍ ഗോള്‍ഡൻ ചാരിയറ്റ് വാഗ്ദാനം ചെയ്യുന്നു. എല്ലാ യാത്രകളും ബെംഗളൂരുവില്‍ ആരംഭിച്ച്‌ ബെംഗളൂരുവില്‍ തന്നെയാണ് അവസാനിക്കുക. എന്നാല്‍, യാത്രകളിലെ റൂട്ടുകള്‍ വ്യത്യസ്തമാണ്. ദക്ഷിണേന്ത്യൻ സംസ്കാരം, പൈതൃകം, പ്രകൃതി സൗന്ദര്യം എന്നിവയ്ക്ക് പ്രാധാന്യം നല്‍കുന്ന റൂട്ടുകളിലൂടെയാണ് ട്രെയിൻ സഞ്ചരിക്കുക.
ഗോള്‍ഡൻ ചാരിയറ്റിന്റെ റൂട്ടുകളും ടിക്കറ്റ് നിരക്കുകളും ചുവടെ
1. പ്രൈഡ് ഓഫ് കർണാടക വിത്ത് ഗോവ (5 രാത്രി / 6 പകല്‍) – 3,98,160 രൂപ
റൂട്ട്: ബെംഗളൂരു – ബന്ദിപ്പൂർ – മൈസൂർ – ഹലേബിഡ് – ചിക്കമംഗളൂരു – ഹംപി – പട്ടടക്കല്‍ & ഐഹോളെ – ഗോവ – ബെംഗളൂരു
2. ജുവല്‍സ് ഓഫ് സൗത്ത് (5 രാത്രി / 6 പകല്‍) – 3,98,160 രൂപ
റൂട്ട്: ബെംഗളൂരു – മൈസൂർ – ഹംപി – മഹാബലിപുരം – തഞ്ചാവൂർ – ചെട്ടിനാട് – കൊച്ചി – കുമരകം – ബെംഗളൂരു
3. ഗ്ലിംപ്സസ് ഓഫ് കർണാടക (3 രാത്രി/ 4 പകല്‍) – 2,65,440 രൂപ
റൂട്ട്: ബെംഗളൂരു – ബന്ദിപ്പൂർ – മൈസൂർ – ഹംപി – ബെംഗളൂരു.
