റെയില്‍വേയുടെ വാദം കളവ്; വന്ദേഭാരതിലെ ഭക്ഷണം മോശമെന്ന് 319 പരാതികള്‍: 15 ലക്ഷത്തോളം രൂപ പിഴയടച്ച് കരാര്‍ കമ്പനി

തിരുവനന്തപുരം: വന്ദേഭാരതിലെ ഭക്ഷണത്തെക്കുറിച്ച്‌ ഒരു പരാതിയുമില്ലെന്ന റെയില്‍വേയുടെ വാദം കളവാണെന്ന വിവരാവകാശ രേഖ പുറത്ത്.

മോശം ഭക്ഷണം വിതരണം ചെയ്‌തു എന്നതടക്കം കഴിഞ്ഞ ഒമ്ബത് മാസത്തിനിടെ 319 പരാതികളാണ് ലഭിച്ചത്. കേരളത്തില്‍ മംഗലാപുരം – തിരുവനന്തപുരം റൂട്ടിലോടുന്ന വന്ദേഭാരത് ട്രെയിനിലാണ് പരാതികള്‍ ഏറെയും. ഈ വർഷം ജനുവരി മുതല്‍ ഏപ്രില്‍ വരെ മാത്രം പരാതിയിനത്തില്‍ മാത്രം 14,87,000 രൂപയാണ് കരാർ കമ്പനി പിഴയടച്ചത്.

ദിവസങ്ങള്‍ക്ക് മുമ്പാണ് വന്ദേഭാരതില്‍ വിതരണം ചെയ്യുന്ന ഭക്ഷണം വൃത്തിയില്ലാത്ത സാഹചര്യത്തില്‍ പാചകം ചെയ്യുന്നതിന്റെ വീഡിയോ ഉള്‍പ്പെടെ പുറത്തുവന്നത്.

എന്നിട്ടും കരാർ കമ്പനിയെ മാറ്റാൻ റെയില്‍വേ തയ്യാറായില്ല. വലിയ സ്വാധീനമുള്ള കമ്പനിയാണ് കരാറുകാർ എന്നാണ് വിവരം. ഇവർ പല ബിനാമികള്‍ വഴിയാണ് പലയിടത്തും കരാർ പിടിക്കുന്നത്.