50 വർഷം മുൻപു തന്നെ അടിച്ചയാളോട് പ്രതികാരം വീട്ടിയത് 62-ാം വയസിൽ: സ്കൂളിലെ അടിപിടി മനസിൽ കൊണ്ടു നടന്നു പകവീട്ടി.

കാസർകോട്: നാലാം ക്ലാസില്‍വച്ച്‌ തല്ലിയതിന് പ്രതികാരം ചെയ്തത് അറുപത്തിരണ്ടാമത്തെ വയസില്‍. മാലോത്തെ ബാലകൃഷ്ണൻ എന്നയാളാണ് മാലോം ടൗണിനടുത്ത് താമസിക്കുന്ന വി ജെ ബാബുവിനോട് പ്രതികാരം ചെയ്തത്.

ബാബുവിന്റെ പരാതിയില്‍ ബാലകൃഷ്ണനും അയാളുടെ സുഹൃത്ത് മാത്യു വലിയപ്ലാക്കലിനുമെതിരെ പൊലീസ്‌ കേസെടുത്തിട്ടുണ്ട്.

മാലോത്ത് ടൗണില്‍ ഈ മാസം രണ്ടിന് ഉച്ചയ്ക്കായിരുന്നു കേസിനാസ്പദമായ സംഭവം നടന്നത്. ബാലകൃഷ്ണൻ ബാബുവിന്റെ ഷർട്ടിന്റെ കോളറില്‍ പിടിച്ചെന്നും മാത്യു കല്ലുകൊണ്ട് മുഖത്തും പുറത്തും ഇടിച്ചെന്നുമാണ് പരാതി.

നാലാം ക്ലാസില്‍ ഒന്നിച്ചുപഠിച്ചവരാണ് ബാബുവും ബാലകൃഷ്ണനും. അന്ന് ഇടയ്ക്കിടെ ഇരുവരും തമ്മില്‍ വഴക്കുണ്ടാകാറുണ്ടായിരുന്നു.

അന്ന് മർദിച്ചതിലുള്ള വൈരാഗ്യമാണ് ഇപ്പോഴുള്ള പ്രശ്നങ്ങള്‍ക്ക് കാരണമെന്ന് ബാലകൃഷ്ണൻ പൊലീസിനോട് പറഞ്ഞു.