പൂജ സാധനങ്ങൾ വിൽക്കുന്ന കടയിൽ നിന്നു എംഡിഎംഎ പിടികൂടി ; ജോലിക്കാരനായ യുവാവ് പിടിയിൽ ; ഏറെ നാളത്തെ നിരീക്ഷണത്തിനൊടുവിലാണ് ഡാൻസാഫ് സംഘവും പൊലീസും എംഡിഎംഎ പിടികൂടിയത്

പത്തനംതിട്ട: പന്തളം കുരമ്പാലയിൽ പൂജ സാധനങ്ങൾ വിൽക്കുന്ന കടയിൽ നിന്നു എംഡിഎംഎ പിടികൂടി. നാല് ​ഗ്രാമാണ് പിടിച്ചെടുത്തത്. സംഭവവുമായി ബന്ധപ്പെട്ട് കടയിൽ ജോലിക്കാരനായ തൃക്കുന്നപ്പുഴ പല്ലന സ്വദേശി അനിയെ അറസ്റ്റ് ചെയ്തു.

രഹസ്യാന്വേഷണ വിഭാ​ഗം റിപ്പോർട്ട് നൽകിയതിന്റെ അടിസ്ഥാനത്തിൽ കടയും ജീവനക്കാരനും ഏറെനാളായി നിരീക്ഷണത്തിലായിരുന്നു. ഇന്ന് ഉച്ചയോടെ ഡാൻസാഫ് സംഘവും പൊലീസും സംയുക്തമായി നടത്തിയ പരിശോധനയിലാണ് എംഡിഎംഎ പിടികൂടിയത്.

കവറുകളിലാക്കിയാണ് പ്രതി എംഡിഎംഎ വിറ്റിരുന്നത്. സംഭവത്തിൽ കൂടുതൽ പേർക്കു പങ്കുണ്ടോ എന്നും എംഡിഎംഎ എത്തിച്ചു നൽകുന്നവരെക്കുറിച്ചും കൂടുതൽ അന്വേഷണം നടക്കുകയാണെന്നു പൊലീസ് വ്യക്തമാക്കി.