കോട്ടയം റെയിൽവേ പ്ലാറ്റ്ഫോമിൽ നടത്തിയ പരിശോധനയിൽ കഞ്ചാവുമായി ഒരാൾ പിടിയിൽ; ഇയാളിൽനിന്ന് ബാ​ഗിൽ വിൽപ്പനയ്ക്കായി സൂക്ഷിച്ചിരുന്ന 3 കിലോ കഞ്ചാവ് പിടിച്ചെടുത്തു

കോട്ടയം: കോട്ടയം റെയിൽവേ പ്ലാറ്റ്ഫോമിൽ നടത്തിയ പരിശോധനക്കിടെ കഞ്ചാവുമായി യുവാവ് പിടിയിൽ. സാബിർ ഫഖീർ (29) എന്ന വെസ്റ്റ് ബം​ഗാൾ സ്വദേശിയാണ് പൊലീസിന്റെ പിടിയിലായത്.

പൊലീസ് സംഘത്തെ കണ്ട് ഓടാൻ ശ്രമിച്ച ഇയാളെ പിടികൂടി ബാ​ഗ് പരിശോധിച്ചപ്പോഴാണ് ബാ​ഗിൽ വിൽപ്പനയ്ക്കായി സൂക്ഷിച്ചിരുന്ന 3 കിലോ കഞ്ചാവ് പിടിച്ചെടുത്തത്.

ഒഡീഷയിൽനിന്നും കഞ്ചാവ് കേരളത്തിൽ എത്തിച്ച് അങ്കമാലി, കാലടി, പെരുമ്പാവൂർ എന്നിവിടങ്ങളിലെ അന്യസംസ്ഥാന തൊഴിലാളികൾക്ക് വിൽപ്പന നടത്തുന്നയാളാണ് പ്രതിയെന്ന് പൊലീസ് പറഞ്ഞു.

എസ്എച്ച്ഒ റെജി പി ജോസഫിന്റെ നേതൃത്വത്തിൽ പിടികൂടിയ ഇയാളെ കോടതിയിൽ ഹാജരാക്കി റിമാൻഡ് ചെയ്തു. എസ് സിപിഒ സന്തോഷ്, സിപിഒ നിധിൻ, എസ് സിപിഒ ഹരിജിത്ത് എന്നിവരും പരിശോധന സംഘത്തിൽ ഉണ്ടായിരുന്നു.