ഏകീകൃത പെൻഷൻ പദ്ധതി ഏപ്രിൽ 1 മുതൽ പ്രാബല്യത്തി ൽ; പദ്ധതിയെക്കുറിച്ച് കൂടുതലറിയാം

ഏകീകൃത പെൻഷൻ പദ്ധതി ഏപ്രിൽ 1 മുതൽ പ്രാബല്യത്തിൽ വരും. ഇതിലൂടെ ഇരുപത്തിമൂന്ന് ലക്ഷം സർക്കാർ ജീവനക്കാർക്ക് പ്രയോജനം ലഭിക്കുമെന്നാണ് പ്രതീക്ഷിക്കുന്നത്. അതേസമയം, നിലവിൽ ദേശീയ പെൻഷൻ സംവിധാനത്തിന് (എൻ.പി.എസ് ) കീഴിൽ വരുന്ന സർക്കാർ ജീവനക്കാർക്ക് എൻ.പി.എസിൽ തുടരാനോ അല്ലെങ്കിൽ പുതിയ സ്‌കീമിലേക്ക് മാറാനോ അവസരമുണ്ട്.

2025 മാർച്ച് 31 വരെ വിരമിക്കുന്ന എല്ലാ കേന്ദ്ര സർക്കാർ ജീവനക്കാർക്കും പെൻഷൻ ലഭിക്കും.

ഏകീകൃത പെൻഷൻ സ്കീമിന് അർഹതയുള്ളവർ

2004 ഏപ്രിൽ ഒന്നിന് ശേഷം സർവിസിൽ ചേർന്ന എല്ലാ സർക്കാർ ജീവനക്കാരും നിലവിൽ എൻ.പി.എസ് ഉണ്ട്. 2025 ഏപ്രിൽ 1 മുതൽ പുതിയ പദ്ധതി പ്രാബല്യത്തിൽ വരുമെങ്കിലും, ദേശീയ പെൻഷൻ സ്കീമിന് (എൻപിഎസ്) കീഴിൽ വരുന്ന ജീവനക്കാർക്ക് അതിൽ തന്നെ തുടരാനോ പുതിയ സ്കീം തിരഞ്ഞെടുക്കാനോ സാധിക്കും.

കുറഞ്ഞത് 25 വർഷം സേവനമനുഷ്ഠിച്ച ജീവനക്കാർക്കാണ് യുപിഎസ് ഉറപ്പായ പെൻഷൻ വാഗ്ദാനം ചെയ്യുന്നു. അതേസമയം, കുറഞ്ഞത് 10 വർഷമെങ്കിലും സേവനമനുഷ്ഠിച്ച ജീവനക്കാർക്ക് പ്രതിമാസം 10,000 രൂപ മിനിമം പെൻഷൻ ലഭിക്കും. കൂടാതെ, അടുത്ത സാമ്പത്തിക വർഷം മുതൽ, പദ്ധതി ഉറപ്പുനൽകുന്ന കുടുംബ പെൻഷനും ലഭിക്കും. ജീവനക്കാരുടെ മരണത്തിന് തൊട്ടുമുമ്പ് അവരുടെ പെൻഷന്റെ 60 ശതമാനം എന്ന നിരക്കിലായിരിക്കും ഈ കുടുംബ പെൻഷൻ കണക്കാക്കുക.

ഏകീകൃത പെൻഷൻ പദ്ധതിയുടെ സവിശേഷതകൾ

ഉറപ്പായ പെൻഷൻ: കുറഞ്ഞത് 25 വർഷത്തെ സേവനമുള്ള വിരമിച്ചവർക്ക് വിരമിക്കലിന് മുമ്പുള്ള അവരുടെ അവസാന 12 മാസങ്ങളിൽ ലഭിച്ച അടിസ്ഥാന ശമ്പളത്തിന്റെ 50% ത്തിന് തുല്യമായ തുക പെൻഷനായി ലഭിക്കും. അതേസമയം, കുറഞ്ഞ സേവന കാലയളവുകൾ ഉള്ളവർക്ക്, പെൻഷൻ ആനുപാതികമായിരിക്കും. കൂടാതെ, കുറഞ്ഞത് 10 വർഷത്തെ സേവനവും ആവശ്യമാണ്.

ഉറപ്പായ കുടുംബ പെൻഷൻ: ഒരു ജീവനക്കാരൻ മരിച്ചാൽ, അയാളുടെ ആശ്രിതർക്ക് സാമ്പത്തിക സഹായം ഉറപ്പാക്കിക്കൊണ്ട്, മരണസമയത്ത് അയാൾക്ക് ലഭിച്ചിരുന്ന പെൻഷൻ തുകയുടെ 60% അയാളുടെ കുടുംബത്തിന് ലഭിക്കും.

ഉറപ്പായ മിനിമം പെൻഷൻ: കുറഞ്ഞ വരുമാനമുള്ള വിരമിച്ച ജീവനക്കാർക്ക് മിനിമം പെൻഷൻ സാമ്പത്തിക സുരക്ഷാ വാഗ്ദാനം ചെയ്യുന്നു. ഇതിലൂടെ, കുറഞ്ഞത് 10 വർഷത്തെ സേവനമുള്ളവർക്ക് പ്രതിമാസം 10,000 രൂപ പെൻഷൻ ലഭിക്കും