മുണ്ടക്കയം ചോറ്റിയില്‍ വാടക വീട് കേന്ദ്രീകരിച്ച്‌ ലഹരി ഇടപാട് ; 10 ഗ്രാം എംഡിഎംഎയുമായി 4 പേർ കസ്റ്റഡിയില്‍ ; പരിശോധന നടത്തിയത് കോട്ടയം ജില്ലാ പൊലീസ് മേധാവിയുടെ സ്ക്വാഡും മുണ്ടക്കയം പൊലീസും ചേർന്ന് ; വീട്ടില്‍ ആഭിചാരക്രിയകള്‍ നടന്നതായും സൂചന

സ്വന്തം ലേഖകൻ

കോട്ടയം : മുണ്ടക്കയം ചോറ്റിയില്‍ വാടക വീട് കേന്ദ്രീകരിച്ച്‌ ലഹരി ഇടപാട് നടത്തിയ 4 പേർ കസ്റ്റഡിയില്‍. 10 ഗ്രാം ഓളം എംഡിഎംഎ പിടിച്ചെടുത്തു.

വീട്ടില്‍ താമസിച്ചിരുന്ന മാതാപിതാക്കളും മകനും മറ്റൊരു യുവാവുമാണ് പിടിയിലായത്. ജില്ലാ പൊലീസ് മേധാവിയുടെ സ്ക്വാഡും മുണ്ടക്കയം പൊലീസും ചേർന്നാണ് പരിശോധന നടത്തിയത്.

വീട്ടില്‍ ആഭിചാരക്രിയകള്‍ നടന്നതിൻ്റെ സൂചനയും പൊലീസിനു ലഭിച്ചു. ഇക്കാര്യങ്ങള്‍ അടക്കം വിശദമായി പരിശോധിച്ചു വരികയാണെന്ന് പൊലീസ് അറിയിച്ചു. 5 ഏക്കറില്‍ സ്ഥിതി ചെയ്യുന്ന പുരയിടത്തില്‍ നിരവധി പേർ പുറത്തു നിന്നും വന്നു പോകുന്നതായി സൂചന ലഭിച്ചിരുന്നു. ഇതേ തുടർന്ന് ദിവസങ്ങളായി പൊലീസ് നിരീക്ഷണത്തിലായിരുന്നു വീടും പരിസരവും.