കേരളത്തില്‍ നിന്ന് അയോധ്യയിലേക്കുള്ള ആദ്യ ട്രെയിൻ സർവീസ് ഇന്ന് മുതല്‍; ആസ്താ സ്പെഷ്യല്‍ ട്രെയിൻ ടിക്കറ്റ് ഐആർസിടിസി ടൂറിസം ബുക്കിംഗ് വെബ്സൈറ്റിലൂടെ ബുക്ക് ചെയ്യാം

പാലക്കാട്: കേരളത്തില്‍ നിന്ന് അയോധ്യയിലേക്കുള്ള ആദ്യ ട്രെയിൻ സർവീസ് ഇന്ന് മുതല്‍.

പാലക്കാട് ഒലവക്കോട് സ്റ്റേഷനില്‍ നിന്ന് വൈകുന്നേരം 7.10-നാകും ആസ്താ സ്പെഷ്യല്‍ ട്രെയിനിന്റെ സർവീസ് ആരംഭിക്കുക. മൂന്നാം ദിനം പുലർച്ചെ മൂന്നിന് അയോധ്യയിലെത്തും.

1,500 പേർക്ക് യാത്ര ചെയ്യാൻ കഴിയുന്ന 22 സ്ലീപ്പർ കോച്ചുകളാണുണ്ടാവുക. കോയമ്ബത്തൂർ, നാഗർകോവില്‍, തിരുവനന്തപുരം വഴിയും അയോധ്യയിലേക്ക് സർവീസ് നടത്തുമെന്ന് വൃത്തങ്ങള്‍ അറിയിച്ചു.

ആദ്യഘട്ടത്തില്‍ ഐആർസിടിസിയുടെ ടൂറിസം ബുക്കിംഗ് വെബ്സൈറ്റിലൂടെ സംഘമായാണ് ടിക്കറ്റുകള്‍ ബുക്ക് ചെയ്യാൻ സാധിക്കുക.

സ്റ്റേഷനില്‍ നിന്നോ ഐആർസിടിസി ആപ്പ് വഴിയോ ടിക്കറ്റ് ബുക്ക് ചെയ്യാൻ കഴിയില്ല. യാത്ര ചെയ്യുന്നവരുടെ പേരുവിവരങ്ങള്‍ ട്രെയിൻ കടന്നുപോകുന്ന സ്റ്റേഷനുകളിലെ ഉന്നത റെയില്‍വേ -സുരക്ഷാ ഉദ്യോഗസ്ഥർക്ക് മുൻകൂട്ടി ലഭ്യമാകും.