പുരാവസ്‌തു തട്ടിപ്പിലെ കള്ളപ്പണയിടപാട് കേസ്; കെ സുധാകരന്‍ ഇന്ന് ഇഡിയ്ക്ക് മുന്നിലേയ്ക്ക്; രാവിലെ പത്തിന് ചോദ്യം ചെയ്യല്‍

സ്വന്തം ലേഖിക

കൊച്ചി: മോൻസണ്‍ മാവുങ്കലിന്റെ പുരാവസ്തു തട്ടിപ്പിലെ കള്ളപ്പണയിടപാട് കേസില്‍ കെപിസിസി അദ്ധ്യക്ഷൻ കെ സുധാകരൻ ഇന്ന് ഇ ഡിയ്ക്ക് മുന്നില്‍ ഹാജരാകും.

കേസില്‍ സുധാകരനും രണ്ട് പൊലീസ് ഓഫീസര്‍മാര്‍ക്കും ചോദ്യം ചെയ്യലിന് ഹാജരാകാൻ ഇഡി നോട്ടീസ് നല്‍കിയിരുന്നു. രാവിലെ പത്ത് മണിയ്ക്ക് കൊച്ചിയിലെ ഇ ഡി ഓഫീസിലാണ് ചോദ്യം ചെയ്യല്‍.

ചോദ്യം ചെയ്യലില്‍ ആശങ്കയില്ലെന്ന് സുധാകരൻ വ്യക്തമാക്കി.
മോൻസണ്‍ മാവുങ്കലിന്റെ കലൂരിലെ വീട്ടില്‍വച്ച്‌ സുധാകരൻ പത്തുലക്ഷം രൂപ കൈപ്പറ്റിയെന്ന് മോൻസണിന്റെ മുൻ ജീവനക്കാരൻ ജിൻസണ്‍ മൊഴി നല്‍കിയിരുന്നു.

2018 നവംബറിലാണ് പണം കൈമാറിയതെന്ന് കേസിലെ പരാതിക്കാരനായ അനൂപും മൊഴി നല്‍കിയിരുന്നു. എന്നാല്‍ ആരോപണങ്ങള്‍ സുധാകരൻ തള്ളി. ഇത് അടക്കമുള്ള സാമ്പത്തിക ഇടപാടുകളുമായി ബന്ധപ്പെട്ടാണ് സുധാകരനെ ചോദ്യം ചെയ്യുന്നത്.