വസ്ത്രങ്ങള്‍ വാങ്ങാനെന്ന വ്യാജേന സ്ഥാപനത്തിലെത്തി; ഷൂവിനുള്ളില്‍ മൊബൈല്‍ വെച്ച് ഷൂട്ടിംഗ്; സ്ത്രീകളുടെ സ്വകാര്യ ദൃശ്യം പകര്‍ത്താന്‍ ശ്രമിച്ച യുവാവ് അറസ്റ്റില്‍

സ്വന്തം ലേഖിക

കണ്ണൂര്‍: മൊബൈല്‍ ഫോണ്‍ ഷൂവിനുള്ളില്‍ വച്ച്‌ സ്വകാര്യ ദൃശ്യം പകര്‍ത്താൻ ശ്രമിച്ച യുവാവിനെ പോലീസ് അറസ്റ്റ് ചെയ്തു.

കണ്ണൂര്‍ കല്യാശേരി സ്വദേശി മുഹനാസാണ് പിടിയിലായത്. കണ്ണൂര്‍ നഗരത്തിലെ വസ്ത്ര വ്യാപാര സ്ഥാപനത്തിലാണ് സംഭവം.

ഷൂവില്‍ ദ്വാരമുണ്ടാക്കി അതില്‍ മൊബൈല്‍ ഫോണ്‍ വെച്ചായിരുന്നു യുവാവ് ദൃശ്യങ്ങള്‍ പകര്‍ത്തിയത്.

വസ്ത്രങ്ങള്‍ വാങ്ങാനെന്ന വ്യാജേന സ്ഥാപനത്തിലെത്തി സ്ത്രീകളുടെ സമീപത്ത് നിന്നാണ് ദൃശ്യങ്ങള്‍ പകര്‍ത്തിയത്.
സംശയം തോന്നിയ ജീവനക്കാര്‍ ചോദ്യം ചെയ്തതോടെയാണ് പദ്ധതി പൊളിഞ്ഞത്.

ഷൂവില്‍ മൊബൈല്‍ വെച്ചതായി കണ്ടതോടെ പോലീസില്‍ വിവരമറിയിക്കുകയായിരുന്നു. തുടര്‍ന്ന് ടൗണ്‍ പോലീസെത്തി യുവാവിനെ കസ്റ്റഡിയിലെടുത്തു.