സ്വന്തം ലേഖകൻ
ആർത്തവം എന്ന വാക്ക് ഉറക്കെ പറയുന്നതു പോലും തെറ്റാണെന്നു വിശ്വസിക്കുന്ന വലിയൊരു ജനത ഇപ്പോഴും നമുക്ക് ചുറ്റുമുണ്ട്.എന്നാൽ ആ ചിന്താഗതി തെറ്റാണെന്നും അത്തരം ചിന്താഗതികൾ പൊളിച്ചെഴുതേണ്ട സമയം അതിക്രമിച്ചിരിക്കുന്നു എന്ന് തെളിയിക്കുന്ന വീഡിയോയാണ് ഇപ്പോൾ സാമൂഹ്യ മാധ്യമങ്ങളിൽ വൈറലാകുന്നത്.സംഗീത അധ്യാപകനായ ജിതേന്ദ്ര ഭട്ട് തന്റെ 13 വയസുള്ള മകള്‍ രാഗിണിയുടെ ആദ്യ ആര്‍ത്തവം ആഘോഷിക്കാനാണ് ഒരു പാര്‍ട്ടി സംഘടിപ്പിച്ചത്. ബന്ധുക്കളെയും പ്രിയപ്പെട്ടവരെയും അറിയിച്ചും, കേക്ക് മുറിച്ചും ആഘോഷിച്ചിരിക്കുകയാണ് ജിതേന്ദ്ര ഭട്ട്.
“ഹാപ്പി പിരീഡ് രാഗിണി” എന്ന് എഴുതിയ ചുവന്ന നിറത്തിലുള്ള ഒരു പ്രത്യേക കേക്കും അദ്ദേഹം മകള്‍ക്കായി ഓര്‍ഡര്‍ ചെയ്തു.ഇതിന്‍റെ ചിത്രങ്ങള്‍ അദ്ദേഹം തന്നെ തന്റെ ഇന്‍സ്റ്റഗ്രാമിലൂടെ പങ്കുവയ്ക്കുകയും ചെയ്തു. തന്റെ മകള്‍ക്ക് സംഭവിച്ചത് തീര്‍ത്തും സാധാരണ കാര്യമാണെന്നും പേടിക്കാനും നാണിക്കാനുമുള്ള ഒന്നുമില്ലന്നും മകള്‍ക്ക് മനസിലാക്കികൊണ്ടുക്കാനാണ് പാര്‍ട്ടി സംഘടിപ്പിച്ചതെന്ന് ജിതേന്ദ്ര ഭട്ട് പറയുന്നു. പലരെയും ക്ഷണിച്ചപ്പോള്‍ ഇതൊക്കെ ആഘോഷിക്കേണ്ടതുണ്ടോ എന്ന ചോദ്യവും കേട്ടു. പാര്‍ട്ടിക്ക് വരുമ്ബോള്‍ ഗിഫ്റ്റ് ആയി സാനിറ്ററി പാഡുകള്‍ കൊണ്ടുവന്നാല്‍ മതിയെന്നാണ് ഞാൻ എല്ലാവരോടും പറഞ്ഞതെന്നും ജിതേന്ദ്ര ഭട്ട് പറയുന്നു.
Whatsapp Group 1 | Whatsapp Group 2 |Telegram Group
‘പിരീഡ്സ് ആഘോഷിക്കേണ്ടതാണെന്ന് ചെറുപ്പം മുതല്‍ തനിക്കു തോന്നിയിരുന്നുവെന്നും ജിതേന്ദ്ര ഭട്ട് ഹ്യൂമൻസ് ഓഫ് ബോംബൈ എന്ന ഇൻസ്റ്റഗ്രാം പേജിലൂടെ പങ്കുവച്ചു. ‘ചെറുപ്പത്തില്‍ എല്ലാ മാസവും ചില ദിവസങ്ങളില്‍ എന്റെ അമ്മയ്ക്കും സഹോദരിമാര്‍ക്കും അമ്മായിമാര്‍ക്കും വീട്ടിനകത്തേക്ക് പ്രവേശനമില്ലായിരുന്നു. മുള കൊണ്ട് കെട്ടിയ ഒരു ചെറിയ പുരയിലാണ് ആ ദിവസങ്ങളില്‍ അവര്‍ താമസിച്ചിരുന്നത്. ഇനി മുള കിട്ടിയില്ലെങ്കില്‍ തൊഴുത്തില്‍ പശുക്കളോടൊപ്പമാണ് താമസിക്കേണ്ടി വരിക. ആര്‍ത്തവ സമയത്ത് സ്ത്രീകളെ ഇങ്ങനെ മാറ്റി നിര്‍ത്തുന്നത് കണ്ട് ദേഷ്യം തോന്നി. അന്ന് എന്റെ 16-ാം വയസില്‍ ഞാൻ ഉറപ്പിച്ചു, ഈ മാറ്റിനിര്‍ത്തല്‍ ഞാൻ അവസാനിപ്പിക്കും’- ജിതേന്ദ്ര ഭട്ട് പറഞ്ഞു. പോസ്റ്റ് വൈറലായതോടെ നിരവധി പേരാണ് ജിതേന്ദ്രയെ അഭിനന്ദിച്ച്‌ രംഗത്തെത്തിയത്. പിരീഡ്സ് നോര്‍മല്‍ ആണെന്ന് ആളുകള്‍ മനസിലാക്കട്ടെ എന്നാണ് മിക്ക സ്ത്രീകളുടെയും അഭിപ്രായം.
