ആലപ്പുഴയില്‍ മത്സ്യബന്ധനത്തിനിടെ ബോട്ടില്‍ നിന്നും കടലിലേക്ക് തെറിച്ച്‌ വീണ് മത്സ്യതൊഴിലാളി മരിച്ചു. ആറാട്ടുപുഴ, കള്ളിക്കാട് വെട്ടത്തുകടവില്‍ നിന്നും മുനമ്പത്ത് മത്സ്യബന്ധനത്തിന് പോയ തെക്കെപോളയില്‍ രാജുവിന്റെ മകൻ രാജേഷാണ് മരിച്ചത്.

സ്വന്തം ലേഖകൻ

ഹരിപ്പാട് : മത്സ്യ ബന്ധനത്തിന് പോയ തൊഴിലാളി കടലിൽ വീണ് മരിച്ചു.കഴിഞ്ഞ ദിവസം പുലര്‍ച്ചെ രണ്ടിനായിരുന്നു സംഭവം.

മത്സ്യബന്ധനത്തിനിടയില്‍ മുനമ്പത്ത് അഴീക്കോടിന് സമീപം ആണ് അപകടം നടന്നത്. കള്ളിക്കാട് കൊടുവക്കാട്ടില്‍ ബാബുവിന്റെ വള്ളത്തിലെ തൊഴിലാളിയായിരുന്നു.

വള്ളത്തില്‍ നിന്നും കടലിലേക്ക് വീണ രാജേഷിനെ കണ്ടെത്താനായി വള്ളത്തിലുണ്ടായിരുന്ന സഹപ്രവര്‍ത്തകര്‍ തെരച്ചില്‍ നടത്തിയെങ്കിലും കണ്ടെത്താനായില്ല.

തുടര്‍ന്ന്, സ്ഥലത്തെത്തിയ കോസ്റ്റല്‍ പൊലീസ് സംഘം മണിക്കൂറുകള്‍ നീണ്ട തെരച്ചിലിനൊടുവിലാണ് സംഭവസ്ഥലത്ത് നിന്നും മൃതദേഹം കണ്ടെത്തിയത്. മാതാവ്: അമ്മിണി. ഭാര്യ: കവിത