കേരള കോൺ​ഗ്രസിൽ വീണ്ടും നേതാക്കളുടെ കൊഴിഞ്ഞുപോക്ക്; ജോസഫ് വിഭാ​ഗം വൈസ് ചെയർമാൻ മാത്യു സ്റ്റീഫൻ രാജിവെച്ചു

സ്വന്തം ലേഖകൻ

കോട്ടയം: കേരള കോൺ​ഗ്രസിൽ വീണ്ടും നേതാക്കളുടെ രാജി തുടരുന്നു. കേരള കോൺ​ഗ്രസ് ജോസഫ് വിഭാ​ഗം വൈസ് ചെയർമാനും ഉടുമ്പൻചോല മുൻ എംഎൽഎയുമായ മാത്യു സ്റ്റീഫൻ പാർട്ടിയിൽ നിന്നും രാജിവെച്ചു.

വ്യക്തിപരമായ കാരണങ്ങളാലാണ് രാജിവെക്കുന്നതെന്ന് മാത്യു സ്റ്റീഫൻ പറഞ്ഞു. കേരള കോൺ​ഗ്രസിന് പ്രഖ്യാപിത ലക്ഷ്യങ്ങളിൽ എത്തിച്ചേരാൻ കഴിഞ്ഞിട്ടില്ല. അത്തരമൊരു പ്രസ്ഥാനത്തിൽ മുന്നോട്ടുപോകാനാകില്ലെന്നും അദ്ദേഹം കൂട്ടിച്ചേർത്തു.

കഴിഞ്ഞ ദിവസം ജോണി നെല്ലൂർ കേരള കോൺ​ഗ്രസിൽ നിന്നും രാജിവെച്ചിരുന്നു. ദേശീയ കാഴ്ചപ്പാടുള്ള പുതിയൊരു രാഷ്ട്രീയ പാർട്ടി രൂപീകരിക്കുമെന്ന് ജോണി നെല്ലൂർ പ്രഖ്യാപിച്ചിരുന്നു.