ഐസ്ക്രീം കഴിച്ചതിന് പിന്നാലെ ഛര്‍ദ്ദി; ആറാം ക്ലാസുകാരന് ദാരുണാന്ത്യം; ഭക്ഷ്യവിഷബാധയെന്ന് സംശയം
സ്വന്തം ലേഖിക
കോഴിക്കോട്: ഐസ്ക്രീം കഴിച്ചതിന് പിന്നാലെ ഛര്‍ദ്ദിയുണ്ടായ വിദ്യാര്‍ത്ഥി മരിച്ചു.
അരിക്കുളം കോറോത്ത് മുഹമ്മദലിയുടെ മകന്‍ അഹമ്മദ് ഹസന്‍ റിഫായിയാണ് (12) മരിച്ചത്.
Whatsapp Group 1 | Whatsapp Group 2 |Telegram Group
ചങ്ങരോത്ത് എ.യു.പി സ്കൂള്‍ ആറാം ക്ലാസ് വിദ്യാര്‍ത്ഥിയാണ്. തിങ്കളാഴ്ച രാവിലെ കോഴിക്കോട്ട് സ്വകാര്യ ആശുപത്രിയിലായിരുന്നു അന്ത്യം.
ഞായറാഴ്ച വൈകിട്ട് റിഫായി ഐസ്ക്രീം കഴിച്ചിരുന്നു, പിന്നീട് ഛര്‍ദ്ദി അനുഭവപ്പെട്ടതിനെ തുടര്‍ന്ന് വീടിന് സമീപത്തെ ക്ലിനിക്കിലും പിന്നീട് മേപ്പയ്യൂരിലും ചികിത്സ തേടി. തിങ്കളാഴ്ച പുലര്‍ച്ചെ അസ്വസ്ഥതകള്‍ വര്‍ദ്ധിച്ചതിനെ തുടര്‍ന്ന് കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലുംം രക്ഷിക്കാനായില്ല.
മൃതദേഹം കോഴിക്കോട് മെഡിക്കല്‍ കോളേജ് ആശുപത്രിയില്‍ പോസ്റ്റ്മോര്‍ട്ടം ചെയ്തു.
ഐസ്ക്രീം വിറ്റ കട താത്കാലികമായി അടച്ച്‌ സീല്‍ ചെയ്തു. കൊയിലാണ്ടി പൊലീസ്, ആരോഗ്യവകുപ്പ് എന്നിവര്‍ സ്ഥലത്ത് പരിശോധന നടത്തി.
ഭക്ഷണാവശിഷ്ടങ്ങളുടെ സാമ്പിള്‍ ശേഖരിച്ചു. ഹെല്‍ത്ത് ഇന്‍സ്പെക്ടറുടെ നേതൃത്വത്തില്‍ പ്രദേശത്ത് പരിശോധന നടത്തി. മരണകാരണം ഐസ്ക്രീ കഴിച്ചതാണെന്ന് തീര്‍ത്ത് പറയാന്‍ കഴിയില്ലെന്നും പോസ്റ്റ്മോര്‍ട്ടം റിപ്പോര്‍ട്ട് ലഭിച്ച ശേഷമേ കാരണം വ്യക്തമാകൂയെന്നും മെഡിക്കല്‍ ഓഫീസര്‍ അറിയിച്ചു.
