ഉറക്കക്കുറവ്, തലവേദന മുതൽ ഹൃദ്രോഗം വരെ..! രാത്രിയിൽ ഈ ഭക്ഷണങ്ങൾ ഒഴിവാക്കുക

സ്വന്തം ലേഖകൻ

ആരോഗ്യകരമായ ജീവിതശൈലിയുടെ അടിത്തറയാണ് നല്ല ഉറക്കം. ഉറക്കം നമ്മുടെ തലച്ചോറിനെയും ശരീരത്തെയും റീചാർജ് ചെയ്യുന്നു. ഉറക്കക്കുറവ് തലവേദന മുതൽ ഹൃദ്രോഗം വരെയുള്ള വിവിധ ആരോഗ്യ പ്രശ്നങ്ങളുമായി ബന്ധപ്പെട്ടിരിക്കുന്നു. കിടക്കയുടെ തരം, വെളിച്ചം, ചുറ്റുപാടുകൾ, താപനില എന്നിവ പോലുള്ള ബാഹ്യ വശങ്ങൾ നിങ്ങളെ നന്നായി ഉറങ്ങാൻ അനുവദിക്കുന്നതിൽ ഒരു പങ്കു വഹിക്കുന്നു.

ഭക്ഷണക്രമം പോലുള്ള ഫിസിയോളജിക്കൽ വശങ്ങളും പ്രധാനമാണ്. ചില ഭക്ഷണപാനീയങ്ങൾ ഉറങ്ങാൻ ബുദ്ധിമുട്ടുണ്ടാക്കും. നല്ല ഉറക്കം ലഭിക്കാൻ രാത്രിയിൽ ഒഴിവാക്കേണ്ട 5 ഭക്ഷണങ്ങൾ ഇവയാണ്.

തക്കാളി
രണ്ട് കാരണങ്ങളാൽ തക്കാളിക്ക് നിങ്ങളുടെ ഉറക്കത്തെ തടയാൻ കഴിയും. ഒന്നാമതായി, തലച്ചോറിന്റെ പ്രവർത്തനത്തെ ഉത്തേജിപ്പിക്കുകയും നിങ്ങളെ ഉണർത്തുകയും ചെയ്യുമെന്ന് പറയപ്പെടുന്ന അമിനോ ആസിഡായ ടൈറാമിൻ ഇതിൽ അടങ്ങിയിരിക്കുന്നു. രണ്ടാമതായി, തക്കാളി അസിഡിറ്റി സ്വഭാവമുള്ളതാണ്. കിടക്കുന്നതിന് തൊട്ടുമുമ്പ് ഇവ കഴിക്കുന്നത് ദഹനത്തിനും അസിഡിറ്റിക്കും കാരണമാകും. അതുകൊണ്ടാണ് ഉറങ്ങുന്നതിന് മുമ്പ് ഓറഞ്ച് പോലുള്ള മറ്റ് സിട്രസ് പഴങ്ങളും ഒഴിവാക്കണമെന്ന് പറയുന്നത്.

വൈറ്റ് ബ്രെഡ്
വൈറ്റ് ബ്രെഡിൽ ധാരാളം ശുദ്ധീകരിച്ച കാർബോഹൈഡ്രേറ്റുകൾ അടങ്ങിയിട്ടുണ്ട്. കൂടാതെ ഉയർന്ന ഗ്ലൈസെമിക് സൂചികയും ഉണ്ട്. അത്തരം ഭക്ഷണങ്ങൾ ഉറക്കമില്ലായ്മയുമായി ബന്ധപ്പെട്ടിരിക്കുന്നുവെന്ന് ഗവേഷണങ്ങൾ തെളിയിച്ചിട്ടുണ്ട്. ഉയർന്ന ജിഐ ഭക്ഷണങ്ങൾ രക്തത്തിലെ പഞ്ചസാരയുടെ അളവ് പെട്ടെന്ന് വർധിക്കുന്നതിന് കാരണമാകുന്നു. നല്ല ഉറക്കത്തെ ബാധിച്ചേക്കാം.

എരിവുള്ള ഭക്ഷണങ്ങൾ
എരിവുള്ള ഭക്ഷണങ്ങൾ ശരീര താപനില വർധിപ്പിച്ചേക്കാം, ഇത് ഉറക്കത്തെ പ്രതികൂലമായി ബാധിക്കും. ചില എരിവുള്ള ഭക്ഷണങ്ങൾ ആസിഡ് റിഫ്ലക്സിനും മറ്റ് കുടൽ പ്രശ്നങ്ങൾക്കും കാരണമാകും. ഏത് തരത്തിലുള്ള ദഹനക്കേടും ഉറക്കത്തെ ബാധിക്കും. അതിനാലാണ് ഉറങ്ങുന്നതിനുമുമ്പ് ജങ്ക് അല്ലെങ്കിൽ സംസ്കരിച്ച ഭക്ഷണങ്ങൾ ഒഴിവാക്കേണ്ടത്.

ഐസ്ക്രീം
ഐസ്ക്രീമിൽ കൊഴുപ്പും പഞ്ചസാരയും കൂടുതലാണ്, ഇവ രണ്ടും ഉറക്കത്തെ തടസപ്പെടുത്തുന്നു. കൊഴുപ്പ് കൂടുതലടങ്ങിയ ഭക്ഷണങ്ങൾ നിങ്ങളെ ഉണർത്തുമെന്ന് വിശ്വസിക്കപ്പെടുന്നു. മാത്രമല്ല, ഇവ ശരിയായി ദഹിക്കാൻ കൂടുതൽ സമയം ആവശ്യമാണ്. പഞ്ചസാര കൂടുതലുള്ള ഭക്ഷണങ്ങൾ ഉറക്കമില്ലായ്മയുമായി ബന്ധപ്പെട്ടിരിക്കുന്നു. അവ ഇൻസുലിൻ അളവിനെയും ബാധിക്കുന്നു. ഇത് ഉറക്കം തടസപ്പെടുത്തും.

ചോക്ലേറ്റ്
ഉറങ്ങുന്നതിനു മുൻപ് ചോക്ലേറ്റ് ഡെസേർട്ട് ഒഴിവാക്കണം. ചില തരം ചോക്ലേറ്റുകളിൽ ടൈറോസിൻ അടങ്ങിയിട്ടുണ്ട്. ഇത് നിങ്ങളെ ജാഗ്രതയോടെ നിലനിർത്തും. ഡാർക്ക് ചോക്ലേറ്റിൽ ഹൃദയമിടിപ്പ് വർധിപ്പിക്കുന്ന തിയോബ്രോമിൻ എന്ന സംയുക്തം അടങ്ങിയിട്ടുണ്ട്. ഇത് ഉറങ്ങാനുള്ള കഴിവിനെയും ബാധിക്കും. ഇതിലെ കഫീൻ ഉള്ളടക്കം ഉറക്കത്തെ തടസപ്പെടുത്തും.