കൊല്ലത്ത് സ്‌കൂട്ടറിന്റെ സീ​റ്റ് കുത്തിത്തുറന്ന് പണവും മദ്യവും മോഷ്ടിച്ചു ; മോഷണ ശേഷം മദ്യകുപ്പിയുടെ ചിത്രം സോഷ്യല്‍ മീഡിയയില്‍ പങ്കുവെച്ചു; മൂന്ന് പേര്‍ അറസ്റ്റിൽ

കൊല്ലം: സ്‌കൂട്ടറിന്റെ സീ​റ്റ് കുത്തിത്തുറന്ന് പണവും മദ്യവും കവര്‍ന്നവര്‍ അറസ്റ്റില്‍. കൊല്ലത്താണ് സംഭവം. വീട്ടില്‍ സൂക്ഷിച്ചിരുന്ന സ്‌കൂട്ടറിന്റെ സീറ്റ് കുത്തിത്തുറന്ന് 3000 രൂപയും 2 കുപ്പി വിദേശമദ്യവും മോഷ്ടിക്കുകയായിരുന്നു.

സംഭവത്തില്‍ തെക്കേവിള കട്ടിയില്‍ കിഴക്കതില്‍ വിശാഖ് (18), കു​റ്റിയില്‍ തൊടിയില്‍ ചിന്നുഭവനില്‍ അജിത്ത് (19), ഇരവിപുരം വാളത്തുംഗല്‍ കട്ടിയില്‍ പുത്തന്‍ വീട്ടില്‍ നീലകണ്ഠന്‍ (18) എന്നിവരെ ഇരവിപുരം പോലീസ് അറസ്റ്റ് ചെയ്തു.

തെക്കേവിള സ്വദേശിനിയുടെ ഉടമസ്ഥതയിലുള്ള സ്‌കൂട്ടറില്‍ നിന്ന് കഴിഞ്ഞ ദിവസം രാത്രിയിലാണ് മോഷണം നടത്തിയത്. മദ്യക്കുപ്പി മോഷ്ടിച്ച ശേഷം നവമാദ്ധ്യമത്തില്‍ ചിത്രം പങ്കുവച്ചതാണ് ഇവരെ പിടികൂടാന്‍ സഹായകരമായത്.