റോഡരികിൽ പാർക്ക് ചെയ്തിരുന്ന കാറിന് മുകളിൽ തെങ്ങ് വീണു; ഏറ്റുമാനൂർ കോടതിയിലെ അഭിഭാഷകന്റെ കാറിന് മുകളിലേക്കാണ് റോഡിന് സമീപത്തെ പുരയിടത്തിലെ തെങ്ങ് കടപുഴകി വീണത്

സ്വന്തം ലേഖകൻ

കോട്ടയം : കോടതിക്ക് സമീപം പാർക്ക് ചെയ്തിരുന്ന അഭിഭാഷകന്റെ കാറിന് മുകളിലേക്ക് തെങ്ങ് കടപുഴകി വീണു.

കോട്ടയം ഏറ്റുമാനൂർ കോടതിയിലെ അഭിഭാഷകനായ ഏറ്റുമാനൂർ മാരിയമ്മൻ കോവിൽ ക്ഷേത്രത്തിനു സമീപം താമസിക്കുന്ന വിജയചന്ദ്രന്റെ ക്രറ്റ കാറിന് മുകളിലേക്കാണ് തെങ്ങ് കട പുഴകി വീണത്.

കാറിന്റെ മുകൾഭാഗവും ചില്ലുകളും തകർന്നു.

കാർ നിർത്തി ഇട്ടശേഷം വിജയചന്ദ്രൻ കോടതിയിലേക്ക് പോയ സമയത്താണ് തെങ്ങ് മറിഞ്ഞത്.

ഈ സമയം കാറിന് സമീപത്ത് കൂടി നടന്നു പോയ യാത്രക്കാരൻ അത്ഭുതകരമായി രക്ഷപ്പെട്ടു.

കോട്ടയത്ത് നിന്നും ഫയർഫോഴ്സ് സംഘം എത്തി കാറിനു മുകളിൽ കിടന്ന തെങ്ങ് മുറിച്ചു മാറ്റി.