എരുമേലിയിൽ കാറും ബൈക്കും കൂട്ടിയിടിച്ച് അപകടം ;ഒരാൾ മരിച്ചു ;ഒരാളുടെ നില ഗുരുതരം

സ്വന്തം ലേഖിക

കോട്ടയം :എരുമേലിയിൽ ഇന്നോവയും ബൈക്കും കൂട്ടിയിടിച്ചുണ്ടായ അപകടത്തിൽ ഒരാൾ മരിച്ചു . ബുധനാഴ്ച രാത്രിയിൽ ഒൻപത് മണിയോടെയാണ് അപകടമുണ്ടായത് .പൊന്തൻപുഴ സ്വദേശിയായ ശ്യാം സന്തോഷാണ് മരിച്ചത്.ഇയാൾക്കൊപ്പമുണ്ടായിരുന്ന യുവാവിനും ഗുരുതരമായി പരിക്കേറ്റു .

എരുമേലി – കരിങ്കല്ലുംമൂഴി റോഡില്‍ പെട്രോള്‍ പമ്പിന് സമീപം ഇന്നോവ ക്രിസ്റ്റയും ബൈക്കും തമ്മിൽ കൂട്ടിയിടിക്കുകയായിരുന്നു.പീരുമേട്ടിൽ നിന്നും റാന്നിയിലേക്ക് പോവുകയായിരുന്ന റാന്നി നിലയ്ക്കല്‍ ഭദ്രാസന മെത്രാപ്പോലീത്ത സഞ്ചരിച്ച കാറും – മുക്കടയില്‍ നിന്നും എരുമേലിയിലേക്ക് വരികയായിരുന്ന യുവാക്കൾ സഞ്ചരിച്ച ബൈക്കുമാണ് അപകടത്തിൽപെട്ടത് .

ഇടിയുടെ ആഘാതത്തിൽ ബൈക്ക് പൂർണമായും തകർന്നു . അപകടത്തിൽ ഗുരുതരമായി പരിക്കേറ്റ യുവാവിനെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു .എരുമേലി പോലീസ് സ്ഥലത്തെത്തി മേല്‍ നടപടികള്‍ സ്വീകരിച്ചു.