ബെെക്ക് യാത്രയ്‌ക്കിടെ പോക്കറ്റിൽ കിടന്ന ഐഫോൺ ചൂടാകാൻ തുടങ്ങി ; പുറത്തെടുത്തപ്പോൾ പുക; തുടർന്ന് ഫോൺ പൊട്ടിത്തെറിച്ചു; ഒഴിവായത് വൻ അ‌പകടം

സ്വന്തം ലേഖകൻ

മലപ്പുറം: ചങ്ങരംകുളത്ത് ഐ ഫോൺ പൊട്ടിത്തെറിച്ചു. ചങ്ങരംകുളം കോക്കൂർ സ്വദേശിയായ ബിലാലിന്റെ ഐഫോൺ 6 പ്ലസാണ് പൊട്ടിത്തെറിച്ചത്. മൊബൈൽ ഹാംഗ് ആയതിനെ തുടർന്ന് സർവീസിന് കൊടുക്കാനായി കൊണ്ട് പോകുന്നതിനിടെയാണ് അപകടം . ബെെക്ക് യാത്രയ്‌ക്കിടെ പോക്കറ്റിൽ കിടന്ന ഫോൺ ചൂടാകാൻ തുടങ്ങി.

പെട്ടെന്ന് വാഹനം നിർത്തി ബിലാൽ ഫോൺ പോക്കറ്റിൽ നിന്നും എടുത്തു. പുക ഉയരുന്നത് കണ്ടതോടെ ഇയാൾ ഫോൺ വലിച്ചെറിഞ്ഞു. തുടർന്ന് ഫോൺ പൊട്ടിത്തെറിക്കുകയായിരുന്നു.

മൊബൈൽ പൂർണമായും കത്തിയതിനാൽ എന്താണ് സംഭവിച്ചതെന്ന് വ്യക്തമല്ല. ബാറ്ററി ഷോർട്ട് ആയതാവാം അപകടത്തിന് പിന്നിലെന്നാണ് പ്രാഥമിക നിഗമനം. ഫോൺ ഉടൻ തന്നെ വലിച്ചെറിഞ്ഞതു​കൊണ്ട് വലിയ അ‌പകടം ഒ​ഴിവായി.